F-16, Taliye cusub.. Xiriirka Soomaaliya iyo Turkiga oo galay marxalad cusub

Muqdisho (Dawan)- Taageerada Turkiga ee Soomaaliya ayaa gaartay heerar cusub kaddib tallaabooyin istaraatiiji ah oo ay qaadday dowladda Turkiga maalmihii lasoo dhaafay kuwaas o soo jiitay indhaha caalamka. Turkiga ayaa Soomaaliya usoo diray diyaaradaha dagaalka ee F-16, taas oo muujinaysa taageero milatari oo heer sare ah. Sidoo kale, in ka badan toban duulimaad oo rakaab ah oo ayay diyaaradda Turkigu ku timid toddobaadkan magaalada Muqdisho.

Dhanka kale, Golaha Wasiirrada Xukuumadda Federaalka Soomaaliya ayaa ansixiyay Khamiistii magacaabista Taliyaha cusub ee Ciidanka Xoogga Dalka, Jeneraal Ibraahim Maxamed Maxamuud, oo ka qalin-jabiyay Akadeemiyada Militariga ee Turkiga. Tallaabadan ayaa si cad u muujinaysa heerka horumarka ee xiriirka difaac ee u dhexeeya labada dal.

Sidoo kale, Golaha Amniga Qaranka ee Turkiga ayaa si rasmi ah mudnaanta u siiyay ilaalinta midnimada dhuleed iyo madax-bannaanida Soomaaliya, go’aan taariikhi ah oo ka tarjumaya mowqif cad oo Ankara ay ka qaadatay difaaca qaranimada Soomaaliya.

Isla toddobaadkan, ciidamo Turki ah ayaa markii ugu horreysay si toos ah uga qeyb qaatay howlgal militari oo ka dhacay deegaanka Jabad Godane, ee gobolka Shabeellaha Dhexe kaas oo ka dhan ahaa kooxda Al-Shabaab. 28-kii Janaayo, tobaneeyo askari oo Turki ah, kuwaas oo watay gaadiid gaashaaman iyo qalab militari oo casri ah, ayaa ka garab dagaallamay ciidamada Gorgor ee ku sugan Jabad Godane ee hoos taga degmada Warsheekh. Deegaankan ayaa ku dhow goob ay dowladda Soomaaliya qorsheyneyso in laga dhiso xarun istaraatiiji ah oo Turkigu ka hirgelinayo adeegyo la xiriira dayax-gacmeedka.

Dhacdooyinkan is biirsaday ayaa qeyb ka ah xiriirka ballaaran ee Turkigu la leeyahay Soomaaliya. Ankara waxay Soomaaliya ka dhistay saldhigga militari ee ugu weyn ee ay ka leedahay meel ka baxsan dhulkeeda, kaas oo lagu tababaro kumannaan askari oo Soomaaliyeed, kuwaas oo si toos ah ugu biira Ciidanka Xoogga Dalka Soomaaliyeed.

Guud ahaan, xiriirka Soomaaliya iyo Turkiga ayaa u muuqda mid galay marxalad cusub, iyadoo labada dal ay si wadajir ah uga shaqeynayaan arrimaha amniga, difaaca, dhaqaalaha, iyo siyaasadda gobolka, taas oo sare u qaadaysa doorka istaraatiijiga ah ee Soomaaliya ee Geeska Afrika.