Fiqi: Somaliland waxay aqoonsiga ku beddelatay inay aqbasho dadka laga soo barakicinayo Gaza

Axmed Macallin Fiqi ayaa carrabka ku adkeeyay in aqoonsi kasta oo Israa’iil ay siiso qayb ka mid ah dhulka Soomaaliya inuu yahay mid baadil ah oo aan wax saameyn sharci iyo mid siyaasadeed aan lahayn, isla markaana uusan waxba ka beddelayn xaqiiqada dhabta ah ee jirta.

Wasiirku wuxuu sidoo kale tilmaamay in Israa’iil ay tahay dowlad gumeysi ku dhisan, isla markaana aanay lahayn sharciyad ama awood siyaasadeed oo u oggolaanaysa in ay aqoonsato dhul ka tirsan dowlad kale oo madax-bannaan. Dhanka kale, waxa uu  ka digay in aqoonsiga Israa’iil ee Somaliland uu khatar ku yahay amniga Carabta iyo Badda Cas, si la mid ah amniga qaranka Soomaaliya.

Isagoo ka hadlayay arrinta barakicinta Falastiiniyiinta, Wasiirka Gaashaandhigga ayaa sheegay in qadiyadda Falastiin ay ka mid tahay mudnaanta koowaad ee siyaasadda arrimaha dibadda ee Soomaaliya, isaga oo carrabka ku adkeeyay in isku day kasta oo lagu doonayo in si khasab ah loogu barakiciyo shacabka Falastiin ama loogu raro dhul kale ay tahay arrin ay si buuxda u diidantahay Soomaaliya.