LAASCAANOOD (Dawan) – Cabdiqaadir Axmed Aw-Cali, oo loo yaqaan Firdhiye, ayaa loo doortay Madaxweynaha dowlad-goboleedka Woqooyi Bari kadib markii uu kaga guuleystay Cabdirisaaq Khaliif Axmed wareeggii labaad ee codbixinta oo Sabtidii ka dhacay Golaha Wakiillada.
Guddoomiyaha Golaha, Aadan Cabdullaahi, ayaa ku dhawaaqay natiijada, isagoo sheegay in Firdhiye uu helay 62 cod, halka Cabdirisaaq Khaliif uu helay 18 cod. Labo cod ayuu heegay inay xumaadeen, waxaana guud ahaan codeeyay 82 xildhibaan.
Tartanka madaxweynenimo waxa uu ku bilowday shan musharax. Wareeggii koowaad codadka sidaan ayaa loo kala helay: Rashiid Faarax Maxamuud – 4 cod; Cabdirisaaq Khaliif Axmed – 20 cod; Jamaal Maxamed Xasan – 15 cod; Cabdiqaadir Axmed Aw-Cali (Firdhiye) – 36 cod; iyo Maxamuud Yuusuf Xasan – 8 cod. Ma jirin musharax helay aqlabiyad buuxda, taasoo sababtay in wareeg labaad la galo oo ay ku tartamaan labada musharax ee ugu codka badnaa: Firdhiye iyo Cabdirisaaq Khaliif.
Wareeggii labaad, Firdhiye ayaa si ballaaran u kasbaday taageerada xildhibaanada, isagoo kaga guuleystay codad fara badan musharraxii uu la tartamayay.
Kadib doorashada Madaxweynaha, Golaha Wakiillada ayaa guda galay doorashada Madaxweyne ku xigeenka. Shanta musharax ee isdiiwaangeliyay waxay ahaayeen: Cumar Daahir Xasan, Cabdirashiid Yuusuf Jibriil (Abwaan), Cabdirisaaq Maxamed Jaamac, Cabdulsataar Sheekh Cismaan Cumar (Dhegacade), iyo Maxamed Cabdi Bulaale. Si kastaba ha ahaatee, Guddoomiyaha Golaha Aadan Cabdullaahi ayaa sheegay in kaliya Cabdirashiid Yuusuf Jibriil (Abwaan) uu ka qeybgalay kulanka kadib markii musharixiintii kale ay ka baaqsadeen. Sidaas darteed waxaa lagu doortay Madaxweyne ku xigeen cod gacan taag ah, isagoo helay 65 cod.
Habraaca doorashada ayaa ku soo dhammaaday dhaarinta Madaxweynaha iyo Madaxweyne ku xigeenka cusub, taas oo si rasmi ah u bilaabeysa maamulka cusub ee Woqooyi Bari. Doorashadan ka dhacday magaalada Laascaanood ayaa ahayd tallaabadii ugu dambeysay ee dhismaha hoggaanka maamulka Woqooyi Bari, kaas oo Dowladda Federaalka Soomaaliya sanadkan aqoonsatay, isla markaana noqday mid ka mid ah dowlad-goboleedyada xubnaha ka ah Federaalka.
Firdhiye hore ayuu u ahaa hoggaamiyaha maamulka SSC-Khaatumo, oo labadii sano ee la soo dhaafay ka talinayay isla dhulkan, ka hor inta aan dib loogu dhisin loona bixinin Woqooyi Bari ee Soomaaliya.
