Jabuuti, 12 Diseembar 2025 (Dawan)- Madaxweynaha Jamhuuriyadda Jabuuti, Ismaaciil Cumar Geelle, ayaa ku boorriyey dalalka Afrika inay horumariyaan awooddooda cilmi-baarista dhanka caafimaadka, isagoo sheegay in aysan suurtagal ahayn in la dhiso nidaam caafimaad oo xooggan haddii si buuxda loogu tiirsanaado gargaar iyo aqoon laga soo guuriyay dibadda.
Madaxweynaha ayaa hadalkan ka jeediyay Shirweynaha Caalamiga ah ee Caafimaadka (International Medical Congress) ee markii labaad lagu qabtay magaalada Jabuuti.
“Ma jiro qaran ama qaarad dhisi karta nidaam caafimaad oo xoogan haddii gebi ahaanba lagu tiirsanyahay aqoon iyo xalal laga soo guuriyay meelo kale,” ayuu yiri Madaxweyne Geelle.
Wuxuu intaa ku daray in qarnigan 21-aad inay tahay in Afrika ay la timaado cilmi-baaristeeda ay ku horumarinayso habraacyada caafimaad, kuna diiwaangeliso cudurrada ka jira, isla markaana ay xal u hesho dhibaatooyinkeeda iyadoo tixgelinaysa duruufteeda gaarka ah.
Madaxweyne Geelle ayaa tilmaamay in Jabuuti ay ku taallo marin istiraatiiji ah oo taas oo ka dhigaysa dal u nugul cudurrada faafa iyo cudurro cusub oo dibadda ka yimaada. Wuxuu carrabka ku adkeeyay baahida loo qabo xoojinta cilmi-baarista si loo sii odoroso khataraha iyo sidii loo dejin lahaa xeelado looga hortago.
Dhankiisa, Wasiirka Caafimaadka Jabuuti, Axmed Rooble Cabdillaahi, ayaa adkeeyay muhiimadda ay leedahay adkeysiga iyo hal-abuurka nidaamka caafimaadka.
