Geelle oo ka qeybgalay furitaanka Mashruuca Dalxiiska Shabeeley

Jigjiga (Dawan)- Madaxweynaha Jamhuuriyadda Jabuuti, Ismaiïl Cumar Geelle, ayaa maanta ka qeybgalay xafladda xarig-jarka mashruuc weyn oo Dalxiiska Shabeeley , kaasoo laga hirgeliyay Dowlad Deegaanka Soomaalida.

Madaxweyne Geelle, oo ka hadlay munaasabadda, ayaa bogaadiyay jihada horumarineed ee mashruuca iyo aragtida dowladda Itoobiya ee ku aaddan horumarinta dalxiiska iyo isku xirka bulshada. “Waxaan maanta u joognaa halkaan inaan ka qeybgalno dabaaldega xarig-jarka goobtan dalxiis ee loogu talagalay nasashada, is-barashada iyo horumarinta dhaqaalaha,” ayuu yiri Geelle.

Madaxweynaha ayaa xusay in Soomaalida Itoobiya ay mar kale muujiyeen kaalinta ay ku leeyihiin horumarka dalka, isagoo tilmaamay in horumarkaasi uu yahay mid loo wada dhan yahay.

Mashruuca Dalxiiska Shabeeley, oo ku fidsan dhul gaaraya ku dhowaad 385 hektar, waxa uu ka koobanyahay hoteello dalxiis, guryo, makhaayado, goobaha jimicsiga iyo xarumo caafimaad iyo nasasho , sida ay sheegeen mas’uuliyiinta Dowlad Deegaanka Soomaalida.

Mas’uuliyiinta Itoobiya ayaa sheegay in mashruucan uu ka mid yahay barnaamij qaran oo lagu ballaarinayo dalxiiska gobollada dalka, kaasoo la bilaabay sanadkii 2023, kuna saleysan horumar waara iyo ilaalinta deegaanka.

Furitaanka mashruucan ayaa imaanaya xilli Itoobiya ay sii kordhinayso maalgelinta dalxiiska si uu u noqdo tiir muhiim u ah horumarka gobollada, halka Jabuuti ay isu muujinayso saaxiib istiraatiiji ah oo muhiim u ah iskaashiga dhaqaale ee ka gudba xuduudaha dalalka Geeska Afrika.