Geerida Garsoore Maxamed Ibraahim oo Gilgishay Garsoorka Kenya

Nairobi 17 December 2025 (Dawan) – Garsooraha Maxkamadda Sare ee dalka Kenya, Maxamed Ibraahim, ayaa geeriyooday isagoo 69 jir ah, sida ay xaqiijisay Hay’adda Garsoorka Kenya.

Garsoore Ibraahim ayaa ku geeriyooday Isbitaalka Aga Khan ee magaalada Nairobi, waxaana geeridiisa ka tacsiayadeeyay madaxa Garsoorka Kenya, Marwo Martha Koome, iyada oo ku tilmaamtay tiir muhiim ah oo ka baxay bahda Garsoorka.

Garsoore Ibraahim ayaa dhowaan galay fasaxii kama dambaysta ahaa, isagoo isu diyaarinayay inuu galo hawlgab marka la gaaro 1-da Janaayo 2026, markaas oo uu gaari lahaa da’da dastuuriga ah ee 70 sano.

Maxamed Ibraahim oo ahaa garsoore sare oo sumcad weyn ku leh gudaha Kenya, ayaa loo magacaabay Maxkamaddii Sare markii ugu horreysay bishii Juun 2011, isaga oo tan markaas kaalin muuqata ka qaatay go’aano taariikhi ah oo la xiriira dastuurka iyo doorashooyinka.

Waxa uu kasoo shaqeeyay waaxyaha dacwadaha madaniga, ganacsiga iyo dastuurka, isaga oo horay garsoore uga soo noqday magaalooyinka Eldoret iyo Mombasa.

Garsoore Ibraahim wuxuu sharciga ka bartay Jaamacadda Nairobi, halkaas oo uu sidoo kale ka qaatay shahaado Machadka Sharciga ee Kenya, waxaana bishii Janaayo 1983 lagu daray Liiska Qareennada, isagoo noqday qareenkii ugu horreeyay ee ka soo jeeda bulshada Soomaaliyeed ee Kenya.

Shaqadiisa sharciyeed waxay diiradda saareysay dacwadaha madaniga, dastuurka, ganacsiga iyo bangiyada. Garsoore Ibraahim wuxuu si gaar ah ugu dheeraa difaaca xuquuqda aadanaha iyo dimuqraadiyadda, taas oo keentay in la xiro bishii Luulyo 1990, muddo bil ah.

Wuxuu xilal muhiim ah ka soo qabtay ururo ay ka mid yihiin Ururka Qareennada Kenya, Kituo Cha Sheria, Barnaamijka Gargaarka iyo Waxbarashada Sharciga, sidoo kalena wuxuu ahaa aasaasaha iyo wakiilka Sanduuqa Mwangaza Trust.

Garsoore Maxamed Warsame ayaa geerida Ibraahim ku tilmaamay khasaare weyn oo ku yimid matalaadda Muslimiinta ee Maxkamadda Sare, isla markaana dhabar-jab ku ah bulshada Soomaaliyeed.

Garsoore Maxamed Ibraahim waxa uu ifka uga tegay xaas iyo afar carruur ah, iyadoo Hay’adda Garsoorka Kenya ay sheegtay in faahfaahinta aaska iyo xuska tacsiyeed la shaacin doono waqti dambe.