Golaha Mustaqbalka oo dhisay guddiga qorsheynta 3 bilood ee soo socota

Kismaayo, 22 December 2025 (Dawan)- Golaha Mustaqbalka Soomaaliyeed ayaa soo bandhigay qorshaha dhammeystirka dhismaha Golaha Mustaqbalka, aragtiyo iyo mabaadi'da saldhig u noqonaya hawlaha Golaha ee mustaqbalka siyaasadeed ee Soomaaliya.

Golaha oo maamlmihii lasoo dhaafay ku shiraay magaalada Kismaayo ayaa meelmariyay qaab-dhismeedka iyo waajibaadka Golaha Mustaqbalka,iyada oo la dhisay guddi ka kooban 6 xubnood kuwaas oo ka kala socda dowlad-goboleedyada Puntland iyo Jubaland iyo Madasha Samatabixinta Soomaaliyeed.

Guddigan ayaa loo xilsaaray isku xirka iyo socodsiinta hawlaha Golaha, waxaana sidoo kale loo igmaday in ay diyaariyaan qorshe hawleedka horutabinta u leh Golaha Mustaqbalka, kaas oo soconaya muddo saddex bilood ah, si loo dardar-geliyo hawlaha muhiimka ah ee siyaasadeed, amni, iyo dhaqaale ee dalka.

Waajibaadka Golaha Mustaqbalka ee la ansixiyay ayaa gaaraya ilaa 11 qodob, kuwaas oo ay ka muuqatay inay ku dheganyihiin Dastuurka Kumeel Gaarka ah ee 2012-kii iyo diidamada muddo kororsi .

Golaha ayaa sidoo kale sheegay in waajibaadkiisa ay ka mid tahay dejinta siyaasadda qaran ee dowlad-dhiska Soomaaliya oo ku saleysan hannaanka federaalka iyo ka shaqeynta doorasho heshiis lagu yahay iyo waqtigeedana ku dhacda.

Guddigan cusub ee qorsheynta 3-da bilood ayaa noqonaya laf-dhabarta hawlaha Golaha Mustaqbalka, waxaana laga sugayaa inay soo bandhigaan qorshayaasha siyaasadeed ee la doonayo in la garab dhigo qorshaha dowladda ay ku dooneyso inay dalka uga hirgeliso doorasho toos ah oo ku dhisan hannaanka qof iyo cod.