Golaha Mustaqbalka oo ku eedeyay madaxweyne Xasan shaqaaqadii Baarlamaanka

Muqdisho (Dawan) – Golaha Mustaqbalka Soomaaliyeed ayaa si adag u cambaareeyay shaqaaqadii maanta ka dhacday Baarlamaanka Federaalka Soomaaliya, iyagoo eedeyn u jeediyay Guddoomiyaha Golaha Shacabka, Aadan Maxamed Nuur (Aadan Madoobe).

Warsaxaafadeed caawa oo Arbaco ah ay soo saareen Golaha Mustaqbalka ayaa lagu sheegay in Guddoomiyaha Golaha Shacabka uu isku dayay in uu wax ka beddelo cutubyada 5-aad ilaa 9-aad ee Dastuurka Kumeelgaarka ah, iyadoo aan heshiis qaran laga gaarin arrintaas.

Goluhu wuxuu sheegay in isku daygaasi uu ka dhashay cadaadis uu Madaxweynaha Jamhuuriyadda Federaalka Soomaaliya, Xasan Sheekh Maxamuud, ku saaray Guddoomiyaha Baarlamaanka, taasoo ay ku tilmaameen mid ujeedkeedu yahay marin-habaabinta shacabka Soomaaliyeed. Waxaana bayaanka lagu yiri:

"Golaha Mustaqbalka Soomaaliyeed wuxuu si buuxda dusha uga saarayaa masuuliyadda siyaasadeed iyo tan sharciyeed Madaxweyne Xasan Sheekh Maxamuud, maaddaama uu isagu ka dambeeyay dhacdadan"

Golaha Mustaqbalka ayaa tilmaamay in falalkaasi ay yihiin kuwo muujinaya masuuliyad-darro siyaasadeed, isla markaana halis ku ah geeddi-socodka wadahadallada qaran, gaar ahaan kuwa u dhexeeya Dowladda Federaalka iyo Golaha Mustaqbalka, oo la qorsheeyay in la qabto 1-da Febraayo 2026. Waxay xuseen in wada-hadalladaasi laga filayo inay horseedaan hannaan doorasho oo sharci ah, ku dhacda waqtigeeda, isla markaana u qabsoonta si nabad ah.

Goluhu wuxuu si cad u muujiyay diidmadiisa wax ka beddel kasta oo lagu sameeyo Dastuurka, isagoo ku baaqay in si degdeg ah loo joojiyo dhammaan tallaabooyinka sharci-darrada ah ee lagu doonayo in lagu beddelo dastuurkii lagu heshiiyay.

"Falka maanta dhacay wuxuu ka dhigan yahay isku day lagu carqaladeynayo wada-hadallada qaran ee socda, waxaana dalbaneynaa in la joojiyo dhammaan tallaabooyinka noocaas ah," ayaa lagu yiri warsaxaafadeedka.

Dhacdadan ayaa timid kadib markii Baarlamaanka uu maanta mar qura isu beddelay fowdo iyo gacan ka hadal, iyadoo Guddoomiyaha Golaha Shacabku uu ku dhawaaqay in doodda wax ka beddelka cutubyada 5-aad ilaa 9-aad ee Dastuurka ay si rasmi ah u bilaabatay.