Golaha Mustaqbalka oo ku shiraya Nairobi ka dib casuumaaddii dowladda

Nairobi, 22 Janaayo 2026 (Dawan)— Isbahaysiga mucaaradka ee loo yaqaan Golaha Mustaqbalka Soomaaliyeed ayaa maanta oo Khamiis ah ku shiraya magaalada Nairobi ee dalka Kenya, si ay go’aan uga gaaraan casuumaddii ka timid Dowladda Federaalka ee Soomaaliya.

Shirka ayaa la filaya inay isugu imaadaan xubno ka tirsan golaha, inkastoo tiradooda aan si rasmi ah loo shaacin.

Kulanka waxaa diiradda lagu saari doona martiqaad ay xukuumadda Madaxweyne Xasan Sheekh Maxamuud soo saartay Isniintii, kaas oo loogu baaqay golaha inay ka qeyb galaan shirka wadatashiga qaran ee Muqdisho ka furmaya 1-da Febraayo, shirkaas oo goluhu hore u codsadeen.

Dowladda Federaalka ayaa sheegtay in uheedka casuumaadda ay tahay in xal looga gaaro ismari-waaga ka taagan hannaanka doorashada dalka, loona abuuro jawi wada-tashi iyo is-afgarad siyaasadeed.

Golahan mucaaradka ah waxaa ku mideysan madaxweynayaasha dowlad-goboleedyada Puntland iyo Jubaland, iyo siyaasiyiin saameyn leh oo horey xilal uga soo qabtay dalka.

Inkastoo aan la saadaalin karin go’aanka ka soo bixi doona shirka Nairobi, haddana haddii ay ka dhalato diidmo ama shuruudo cusub, waxaa suuragal ah in taas ay caqabad ku noqoto shirka 1-da Febraayo, isla markaana ay sii qoto-dheereyso kala qeybsanaanta dhinacyada, gaar ahaan habka doorashooyinka oo weli aan xal rasmi ah laga gaarin.