Golaha Shacabka oo Doortay Xubin Cusub oo Guddiga Dib-u-eegista Dastuurka ah

Muqdisho, 13 Oktoobar 2025 — Golaha Shacabka ee Baarlamaanka Federaalka Soomaaliya ayaa Cumar Cali Isaaq u doortay xubin cusub oo ka mid noqonaya guddiga dib-u-eegista dastuurka, kadib doorasho hal wareeg ah oo lagu qabtay xarunta Golaha.

Doorashada waxaa ku tartamay Luul Ibraahim Cali iyo Cumar Cali Isaaq, kuwaas oo u loollamayay kursi bannaan oo ka mid ah guddiga ku shaqada leh dhammeystirka dastuurka dalka. 160 xildhibaan ayaa ka qeyb galay codeynta, taas oo uu hoggaaminayay Guddoomiyaha Golaha Shacabka Aadan Maxamed Nuur (Madoobe).

Cumar Cali Isaaq ayaa helay 92 cod, halka Luul Ibraahim ay heshay 68 cod. Kursiga ayaa banaanaa muddo ku dhow hal sano, kadib markii Yuusuf Maxamed Waliid loo magacaabay Wasiiru Dowlaha Wasaaradda Kalluumeysiga.

Ka dib doorashada, Luul Ibraahim ayaa sheegtay in tartanku uu ahaa mid adag oo u dhigma doorashada madaxweynaha, iyadoo tiri:

“Tartankan wuxuu ahaa mid aad u adag, sida doorashada madaxweynaha oo kale. Aad baan ugu faraxsanahay inaan aniga, oo haweeney ah, u istaagay kursigan.”

Dhankiisa, Cumar Cali Isaaq ayaa sheegay inuu muddo ku dhow hal sano ololaha ku jiray si uu kursiga u helo:

“Kursigaan ayaa banaanaa markii saaxiibkay wasiir noqday. Muddo dheer ayaan dadaal ku jiray si aan u guuleysto, maanta waan ku faraxsanahay in aan booskan helo.”

Guddiga dib-u-eegista dastuurka ayaa ka kooban 10 xubnood, oo kala ah shan xubnood oo ka socda Golaha Shacabka iyo shan xubnood oo ka socda Aqalka Sare, waxaana guddigan u xil saran yahay mas’uuliyadda dhammeystirka dastuurka dalka oo cutubyo dhowr ah horay loo ansixiyay.