Muqdisho ( Dawan)- Golaha Wadatashiga Qaranka Soomaaliya (NCC) ayaa maanta oo Sabti ah soo dhaweeyay ajiibidda Golaha Mustaqbalka ee Soomaaliya, oo ay ku aqbaleen martiqaadkii dowladda federaalka ee loogu talagalay Madasha Wadatashiga Qaranka ee la qorsheeyay 1-da Febraayo 2026.
Kulankan fogaan-aragga ah, oo uu guddoomiyay Madaxweyne Xasan Sheekh Maxamuud, ayaa waxaa ka qaybgalay Ra’iisul Wasaare Xamsa Cabdi Barre, ku-xigeenkiisa, iyo madaxda dowlad goboleedyada xubnaha ka ah dowladda federaalka ee Hirshabeelle, Galmudug, Woqooyi Bari, Koonfur Galbeed, iyo Gobolka Banaadir.
War-saxaafadeed kasoo baxay NCC ayaa lagu sheegay in ansixinta gogosha wadatashigu ay tahay tallaabo muhiim ah oo lagu xoojinayo wada-hadalka qaran iyo iskaashiga u dhexeeya Dowladda Federaalka iyo dowlad-goboleedyada. Golaha ayaa sidoo kale isku raacay in la dardargeliyo doorashooyinka golayaasha deegaanka ee guud ahaan dalka, iyadoo tusaale looga dhigay doorashooyinkii golaha deegaanka ee Gobolka Banaadir oo lagu tilmaamay guul weyn.
