Golaha Wasiirrada Somaliland oo ansixiyay Xeerka Abuurka Beeraha

Hargeysa. 11 December, 2025 (Dawan)- Golaha Wasiirrada Somaliland ayaa ansixiyay Xeerka Abuurka Beeraha, kadib kulankii ay yeesheen Arbacaadi ee uu shir-guddoominayey Madaxweynaha Somaliland, Cabdiraxmaan Maxamed Cabdillaahi (Cirro),

Intii kulanku socday, Garyaqaanka Guud ee Xukuumadda, Cali Baashe Maxamed, iyo Wasiirka Horumarinta Beeraha, Maxamuud Cige Yuusuf, ayaa Golaha la wadaagay warbixin dhamaystiran oo ku saabsan qabyo-qoraalka xeerkan, iyagoo sharaxay muhiimadda uu u leeyahay kor u qaadista wax-soo-saarka beeraha, tayeynta abuurka, iyo abuurista nidaam casri ah oo hagaya horumarinta beeraha .

Madaxweyne Cirro oo ka hadlay kulanka ayaa tilmaamay in xeerkan uu yahay mid lagama maarmaan u ah amni-cunnadeedka, horumarinta dhaqaalaha, iyo yareynta ku tiirsanaanta abuurka dibadda. Waxa uu yiri: “Xeerkan wuxuu xoojinayaa wax-soo-saarka beeraha iyo tayeynta abuurka dalka.”

Kadib dood iyo falanqayn dheer oo ay yeesheen xubnaha Golaha, Madaxweynaha ayaa codsaday in loo codeeyo xeerka. Dhammaan 36-ka xubnood ee goob joogga ahaa kulanka ayaa si wadar ogol ah u ansixiyay, iyadoo aanay jirin wax diidmo ama ka-aamus ah.

Xeerkan Abuurka Beeraha ayaa noqday xeerkii siddeedaad ee ay Xukuumadda hadda jirtaa ansixiso; lix ka mid ah xeerarradan waa kuwo cusub, halka labada kale lagu sameeyay wax-ka-beddel muddadii xukuumaddii hore.

Ansixinta xeerkan ayaa qeyb ka ah dadaallada Somaliland ay ku doonayso inay hormariso wax-soo-saarka beeraha, ilaalinta tayada abuurka, isla markaana ku xoojiso nidaamka sharci ee kobcinta dhaqaalaha.