Soomaaliya,15 October 2025 — Guddiga Madaxa Bannaan ee Doorashooyinka iyo Xuduudaha Qaranka (NIEBC) ayaa ku dhawaaqay in liiska ku-meel-gaarka ah ee codbixiyayaasha doorashada Soomaaliya la shaacin doono toddobaadka soo socda.
Guddoomiyaha guddiga, Cabdikariin Axmed Xasan, ayaa hadalkan ka sheegay munaasabadda lagu soo xirayay maalintii labaad ee Banbaxa Guddiga Doorashada iyo Ururrada Siyaasadda, isagoo tilmaamay in liiska ku-meel-gaarka ah la daabici doono Axadda, 19-ka Oktoobar 2025, halka liiska kama dambaysta ah la filayo in la soo saaro labo toddobaad kadib.
“Liiska ku-meel-gaarka ah ee codbixiyayaasha waxaa la shaacin doonaa 19-ka bishan Oktoobar,” ayuu yiri guddoomiyaha, isaga oo xusay in guddigu u heellan yahay si bulshada iyo ururrada siyaasadeed ay si fudud ugu heli karaan xogta.
Wuxuu sheegay in shirkadda qandaraaska ku heshay ay diyaarinayso warbixinta, isla markaana ay si rasmi ah ugu soo bandhigi doonto si dadweynha iyo ururrada siyaasadeed u eegaan, si la sameeyo hubin iyo dib-u-eegis (audit).
