Soomaaliya, 13 November 2025 — Wasaaradda Warfaafinta, Dhaqanka iyo Dalxiiska ee Soomaaliya ayaa Arbacadii soo dhawaysay wafdi heer sare ah oo ka socda Guddiga Kiswahili ee Bariga Afrika (EAKC) oo ku sugnaa Muqdisho si looga wada hadlo hirgelinta afka Kiswahili ee Soomaaliya, kadib markii ay ku biirtay Golaha Iskaashiga Afrika Bari (EAC).
Wafdiga, oo uu hoggaaminaysay Xoghayaha Fulinta ee EAKC, Caroline Asiimwe, ayaa la kulmay Wasiir ku-xigeenka Warfaafinta, Abdirahman Yusuf Al-Cadaala. Wadahadallada ayaa diiradda lagu saaray horumarinta hirgelinta Sawaaxiliga oo ka mid ah afafka rasmiga ah ee EAC, iyo xoojinta iskaashiga dhaqanka iyo waxbarashada.
Wasiir ku-xigeenka Al-Cadaala ayaa kulanka ku tilmaamay guul muhiim ah, isagoo yiri:“Waxaan aad ugu faraxsanahay soo dhoweynta wafdiga mas’uulka ka ah hirgelinta afka Kiswahili, oo ka mid ah afafka rasmiga ah ee Golaha Iskaashiga Afrika Bari. Soomaaliya waxaa si buuxda u go’an in ay fuliso waajibaadkeeda xubinnimada cusub ee Golaha.”
Al-Cadaala wuxuu kaloo carrabka ku adkeeyay in hirgelinta Kiswahili ay tahay masuuliyad wadajir ah, isla markaana ay tahay tallaabo muhiim ah oo lagu xoojinayo iskaashiga iyo isgaarsiinta gobolka.“Hirgelinta afka Kiswahili oo ka mid ah afafka rasmiga ah ee Golaha Iskaashiga Afrika Bari waa masuuliyad qaran oo looga baahan yahay in lagu fuliya guud ahaan dalka,” ayuu intaa ku daray.
