Guuleystayaasha tartanka Qur’aanka Kariimka ee Soomaaliya oo la shaaciyay

Muqdisho (Dawan) – Guddiga garsoorka ee Tartanka Sanadlaha Heerka Qaran ee xifdinta Qur’aanka Kariimka ayaa ku dhawaaqay ardaydii ku guuleysatay tartanka, iyadoo kaalinta koowaad uu galay Cabdinaasir Maxamed Cabdullaahi oo helay boqolkiiba 99.78, kuna helay abaalmarin lacageed oo dhan $20,000.

Tartankan, oo sanadkii afraad uu Madaxweyne Xasan Sheekh Maxamuud maalgelinayo, ayaa waxaa ka qeyb galay arday ka kala socday dowlad-goboleedyada xubnaha ka ah dowladda federaalka iyo gobolka Banaadir. Guddiga garsoorka ayaa sheegay in ardayda ka qeyb gashay tartanka ay soo mareen isreeb-reeb heer dowlad-goboleed ah, halkaas oo afarta arday ee ugu sarreeya ay u soo gudbeen tartanka heerka qaran.

Wadarta guud ee ardayda ka qeyb gashay tartanka ayaa gaartay 28 arday, kuwaas oo ka kala socday lix dowlad-goboleed iyo gobolka Banaadir. Tartanka ayaa socday muddo saddex maalmood ah, iyadoo ardaydu ku baratameen xifdiga 30-ka jus ee Qur’aanka Kariimka.

Ardayda Kaalmaha Hore Gashay

Guddiga ayaa ku dhawaaqay toddobada arday ee kaalmaha ugu sarreeya, kuwaas oo la siiyay abaalmarin lacageed si loo dhiirrigeliyo xifdiga Qur’aanka Kariimka iyo barashada cilmiga diinta:

Cabdinaasir Maxamed Cabdullaahi – 99.78% – Kaalinta 1aad – $20,000

Maxamed Nuur Maxamed – 99.47% – Kaalinta 2aad – $15,000

Bushra Maxamed Axmed – 99.30% – Kaalinta 3aad – $10,000

Cabdiraxmaan Cilmi Maxamuud Axmed – 99.21% – Kaalinta 4aad – $7,000

Muna Cabdiraxmaan Maxamed – 99.14% – Kaalinta 5aad – $5,000

Salmaan Jimcaale Axmed – 98.90% – Kaalinta 6aad – $3,000

Usaama Ibraahim Maxamed – 96.53% – Kaalinta 7aad – $2,000

Guddiga garsoorka, oo ka koobnaa culimo iyo aqoonyahanno heer qaran ah, ayaa sheegay in tartanku uu muhiim u yahay dhiirrigelinta dhalinyarada Soomaaliyeed si ay u bartaan oo u xifdiyaan Qur’aanka Kariimka.

Mas’uuliyiinta ka hadlay xafladda ayaa sidoo kale hambalyo u diray dhammaan ardaydii ka qeyb gashay tartanka, iyagoo tilmaamay in guusha ardayda Soomaaliyeed ay muujinayso sida bulshada Soomaaliyeed ay ugu dhowdahay diinta Islaamka iyo barashada Qur’aanka Kariimka.