Guutada Hiil-Walaal 13 oo isu diyaarinaysa howlgalka nabad-ilaalinta Soomaaliya

Jabuuti (Dawan ) – Guutada Hiil-Walaal 13 ee Ciidamada Qalabka Sida ee Jamhuuriyadda Jabuuti ayaa ku jirta diyaargarowgii ugu dambeeyay ee ay ugu soo ambabixi lahaayeen howlgalka nabad-ilaalinta Soomaaliya, iyadoo la qorsheynayo in ciidamadu dalka soo galaan 16-ka Maarso.

Taliyaha guud ee Ciidamada Qalabka Sida ee Jabuuti, Jeneraal Zakariye Sheekh Ibraahim, ayaa kormeer ku tagay xerada tababarka Cali Cune ee gobolka Carta, halkaas oo uu kula kulmay ciidanka guutada iyo saraakiishooda.

Kormeerka ayaa lagu eegay heerka diyaar-garowga ciidamada iyo sida ay ugu diyaar garoobeen howlgalka ay ka fulin doonaan Soomaaliya.

Jeneraal Zakariye Sheekh Ibraahim ayaa sidoo kale dardaaran u jeediyay ciidamada, isagoo ku booriyay inay muujiyaan anshax, midnimo iyo xirfad marka ay gaaraan Soomaaliya.

Wuxuu xusay in ciidanka loo dirayo howlgalka ay matalayaan dalka Jabuuti, isla markaana ay door muhiim ah ka qaadan doonaan taageeridda amniga iyo xasilloonida Soomaaliya.

Guutada Hiil-Walaal 13 ayaa beddeli doonta guutadii 12-aad ee hore uga howlgalaysay Soomaaliya, iyadoo ka shaqeyn doonta ilaalinta amniga iyo taageeridda howlaha nabad-ilaalinta ee ka socda qaybo ka mid ah dalka, gaar ahaan gobolka Hiiraan.

Ciidamada Jabuuti ayaa ka mid ah ciidamada gobolka ee door muuqda ka qaata Hawlgalka Taageerada iyo Xasilinta Midowga Afrika ee Soomaaliya, kaas oo dhowr jeer magaciisa la beddelay. Waxayna muddo dheer ka howlgalayeen deegaanno ay ka mid yihiin Beledweyne, Jalalaqsi iyo Buulo Burde, halkaas oo ay gacan ka geystaan sugidda amniga iyo ilaalinta bulshada rayidka ah.