Muqdisho (Dawan)– Khilaafkii xoogganaa ee u dhexeeyay safaaradaha Soomaaliya ee Tanzania iyo Kenya ayaa su'aal geliyay hannaanka ay diblomaasiyiinta Soomaaliyeed ay u maareeyaan khilaafaadka dhaxdooda ah. Waxaa arrin lama filaan ah ku noqotay shacabka Soomaaliyeed in diblomaasiyiintu ay baraha bulshada isku mariyaan farriimo ay habbooneed in si hoose loo wadagaao loona maro habaraca xallinta wixii mugdi soo galo.
Wasiiru dowlaha Wasaaradda Arrimaha Dibadda, Cali Cumar (Cali Balcad) oo marti ku ahaa Miizaan Podcast ee ka baxa Dawan Media ayaa sheegay in la xalliyay qaddiyaas, kaddib markii ay Wasaaraddu u xilsaartay guddiga lataliyeyaasha ah ee ka kooban safiiradii hore ee dalka in ay baaritaan ku sameeyaan.
Cali Balcad waxa uu tilmaamay in Guddigaas uu kulan la yeeshay labadii safiir ee khilaafka ku lugta lahaa , kadibna uu soo saaray talooyin lagu hagaajinayo habraacyada diblomaasiyadeed.
"Howshaas waa la xalliyay. Guddi la taliyaal ah oo ka kooban safiiradii hore ee dalka ayay Wasaaraddu u xil saartay inay baaraan arrintan. Labada safiir ayaa loo yeeray waxaa lala yeeshay kulan, kadibna guddigu wuxuu ka bixiyay talooyin" ayuu yiri, Balcad, isaga oo habdhaqankaas ku tilmaamay inuu ahaa nasiib darro, balse wax laga bartay, isla markaana uu rajeynayo in uusan mar dambe soo noqon.
