Moqdisho (Dawan)– Afhayeenka Madaxtooyada Soomaaliya, Cabdiraxmaan Xadaana, ayaa faahfaahin ka bixiyay halka ay marayaan diyaar-garowga iyo qabqanqaabada shirkii wadahadalka dowladda federaalka iyo mucaaradka, kaas oo lagu ballaansanaa inuu magaalada Muqdisho ka furmo bilowga bishaan Febraayo.
Afhayeenka oo la hadlay Dawan Media wuxuu sheegay in Madaxweynaha Xasan Sheekh Maxamuud uu doonayo in ummadda Soomaaliyeed ay meel isugu timaado, si arrimaha waqtigan taagan looga wada hadlo, islamarkaana xal waara looga gaaro.
Wuxuu intaa ku daray in Ra’iisul Wasaare Xamse Cabdi Barre uu hadda hogaaminayo wadahadallada, kadib markii Madaxweynaha u igmaday, islamarkaana uu wado kulamo gaar-gaar ah oo uu la yeeshay siyaasiyiinta kala duwan. Kulamadii ugu dambeeyay waxaa ka mid ahaa madaxda dowlad-goboleedyada Puntland iyo Jubaland, halka kulamadii ka horeeyay uu la yeeshay Shariif Sheekh Axmed iyo Maxamed Xuseen Rooble.
Cabdiraxmaan Xadaana ayaa carabka ku adkeeyay in loo baahan yahay doorasho dadweyne oo matalaysa shacabka, isla markaana lagu wada qanacsan yahay, si loo xaqiijiyo nabadda iyo horumarka dalka.
