Yemen – 8 Jannaayo 2026 (Dawan)- Isbahaysiga militari ee uu hoggaamiyo Boqortooyada Sucuudiga ayaa sheegay in Caydarous al-Zubaidi, hoggaamiyaha Golaha Ku-meel-gaarka ah ee Koonfurta Yemen, inuu ka baxsaday koonfurta dalkaas, isaga oo sii maray Somaliland iyo Muqdisho, ka hor inta uusan gaarin dalka Isutagga Imaaraadka Carabta.
Bayaan maanta oo Khamiis ah ka soo baxay isbahaysiga ayaa lagu sheegay in al-Zubaidi uu magaalada Cadann kaga baxay doon saqdii dhexe ee habeenkii Arbacada, isaga iyo xubno la socday, xilli ay sii kordhayeen duqeymaha cirka iyo cadaadiska militari ee lagu hayay fariisimaha ciidamadiisa ku sugan koonfurta Yemen.
Afhayeenka isbahaysiga, Janaraal Turki al-Maliki, ayaa sheegay in la damiyay nidaamka aqoonsiga tooska ah ee doonta ay la socdeen al-Zubaidi iyo dhowr qof kale, si ay uga dhuuntaan dabagalka, ka hor inta uusan ku xiran dekedda Berbera ee Somaliland abaare duhurnimadii Arbacada, waqtiga Soomaaliya.
Sida uu sheegay isbahaysigu, al-Zubaidi ayaa Berbera kula xiriiray sarkaal milatari oo u dhashay Imaaraadka Carabta, waxaana halkaas looga sii qaaday diyaarad nooca Ilyushin IL-76 ah. Diyaaradda ayaa markii hore ka degtay Garoonka Caalamiga ah ee Muqdisho, ka hor inta aysan u jihaysan dhanka Gacanka Carabta.
