Howlgal ka dhacay Sh/Hoose oo lagu dilay xubno ka tirsan AS

Muqdisho, 29 Janaayo 2026 (Dawan)– Ciidamada Xoogga Dalka Soomaaliyeed, oo kaashanaya saaxiibada caalamiga ah, ayaa dilay afar xubnood oo ka tirsanaa kooxda Al-Shabaab, kaddib howlgallo amni oo si gaar ah loogu tilmaameedsaday xubno ka tirsan Al-Shabaab, sida ay sheegtay Wasaaradda Gaashaandhigga Soomaaliya.

War-saxaafadeed ka soo baxay Wasaaradda Gaashaandhigga maanta oo Khamiis ah ayaa lagu sheegay in ujeeddada howlgallada ay ahayd burburinta shabakadaha Al-Shabaab iyo miinooyinka ay ku aasayeen waddooyinka, kuwaas oo halis ku ah nolosha shacabka. Howlgallada ayaa laga fuliyay deegaanka Mubaarak ee gobolka Shabeellaha Hoose.

Wasaaraddu waxay sheegtay in afarta qof ee la dilay ay ku jireen howlo ay ku aasayeen miinooyin waddooyinka mara deegaanka, kuwaas oo ay si joogto ah ugu waxyeelleeyaan dad rayid ah iyo gaadiidka isticmaala waddooyinkaasi.

“Ciidamada Qaranka waxaa ka go’an ciribtirka maleeshiyaadka argagixisada ah ee khatarta ku ah amniga shacabka iyo isu-socodka waddooyinka,” ayaa lagu yiri bayaanka. “ iyada oo lagu soo gabagabeeyay " Wasaaradda Gaashaandhigga iyo Taliska Ciidanka Xoogga Dalka Soomaaliyeed waxay mar kale adkaynayaan in howlgallada ka dhanka ah argagixisada ay sii socon doonaan ilaa laga xaqiijiyo amni, xasillooni, iyo nabad waarta guud ahaan dalka.”

Gobolka Shabeellaha Hoose ayaa ka mid ah gobollada koonfurta Soomaaliya ee ay weli ku sugan yihiin dagaalamayaasha Al-Shabaab, iyadoo bilihii u dambeeyay ay ka socdeen howlgallo isugu jira cir iyo dhul, kuwaas oo ay iska kaashanayaan Ciidanka Xoogga Dalka, kuwa Midowga Afrika, iyo saaxiibada caalamiga ah.