Muqdisho (Dawan)- Guddiga Madaxa Bannaan ee Doorashooyinka Qaranka iyo Soohdimaha ayaa shaaciyay faahfaahin ballaaran oo ku saabsan doorashada golaha deegaanka ee gobolka Banaadir, taas oo la qorsheeyay inay qabsoonto Khamiista soo socota, kuna beegan 25-ka Diseembar.
Sida uu Guddoomiyaha Guddiga Cabdikariim Axmed Xasan sheegay, doorashadan ayaa waxaa ka qeybgelaya 20 urur siyaasadeed, halka tirada murashaxiinta u tartamaysa ay ka badan yihiin 1,600 oo qof, kuwaas oo ku loollamaya 390 kursi oo golaha deegaanka ah.
Doorashada ayaa ka dhici doonta 523 goobood oo codbixin ah, kuwaas oo ku kala yaalla 16 degmo oo ka tirsan gobolka Banaadir. Waxaa la filayaa in ku dhowaad 400,000 oo muwaadiniin ah, kuwaas oo horey u qaatay kaararka codbixinta in ay ka qeyb qaataan codeynta.
