Soomaaliya, 14 Maarso 2026 (Dawan)– Hay’adda Sirdoonka iyo Nabadsugidda Qaranka Soomaaliya (NISA) ayaa xalay oo Jimco ah sheegtay in duqeymo ay la kaashadeen saaxiibada caalamiga ah lagu dilay in ka badan 22 dagaalyahan oo ka tirsan Al-Shabaab, kuwaas oo ay ku jiraan dhowr hoggaamiye sare.
Hawlgalladan ayaa lagu beegsaday xubno ka tirsan Al-Shabaab oo ku sugnaa gobollada dhexe ee Mudug iyo Hiiraan, sida lagu sheegay qoraal ka soo baxay hay’adda NISA.
NISA waxay sheegtay in gobolka Mudug, gaar ahaan deegaanka Dumaaye, lagu dilay 15 xubnood xilli ay ku jireen kulan ay lahaayeen madaxda kooxda ee gobolkaas. Hay’addu waxay sidoo kale tilmaantay dhowr shaqsi oo sare oo ka mid ahaa dadka la dilay, kuwaas oo ay ku jiraan gacanyarihii wakiilka Al-Shabaab ee Mudug iyo madaxii hore ee kooxda ee gobolkaas.
Dhanka gobolka Hiiraan, weerar kale oo ka dhacay degmada Maxaas ayaa lagu beegsaday guri ay ku sugnaayeen xubno ka tirsan kooxda, kaas oo uu isticmaalayay Mustaf Atto, oo NISA sheegtay inuu ahaa madaxii Al-Shabaab u qaabilsanaa gobolka Hiiraan.
