In ka badan 6 milyan oo Soomaali ah oo halis ugu jira gaajo

Muqdisho, 24 Febraayo 2026 (Dawan)– Dowladda Federaalka Soomaaliya iyo Qaramada Midoobay ayaa ka digay in ku dhowaad 6.5 milyan oo qof ay wajahayaan gaajo ba’an, xilli abaaro sii kordhaya, amni darro iyo dhaqaale yari ay dalka u sii riixayaan xaalad bini’aadantinimo oo degdeg ah.

Bayaan wadajir ah oo ay maanta oo Talaado ah soo saareen dowladda federaalka iyo hay’adaha Qaramada Midoobay ayaa lagu sheegay in in ka badan 1.8 milyan oo carruur ah la filayo inay la kulmaan nafaqo-xumo ba’an sanadkan, oo ay ku jiraan ku dhowaad nus milyan carruur ah oo laga yaabo inay wajahaan nafaqo-xumo aad u daran.

Sida ku cad qiimeyntii ugu dambeysay ee Sugnaanta Cuntada (IPC), 6.5 milyan oo qof ayaa la saadaalinayaa inay gaaraan heerarka gaajada ee sii xumaanaya (IPC Wajiyada 3 iyo 4) illaa Maarso 2026, kuwaas oo ay ku jiraan qiyaastii 2 milyan oo qof oo ku jira xaalad degdeg ah.

Bayaanka ayaa xusay in cunno-yarida ay sii kordhisay biyo la’aan baahsan, iskahorimaadyo, barakac iyo hoos u dhac ku yimid gargaarka.

Abaarta ayaa sababtay dalagyo baaba’ay, xoolo dhintay, kor u kaca qiimaha cuntada iyo barakac ballaaran, gaar ahaan gobollada koonfurta iyo bartamaha Soomaaliya.

Inkasta oo roobabka Gu’ga ee la filayo inta u dhaxaysa Abriil iyo Juun ay keeni karaan nafis kooban, dowladda iyo Qaramada Midoobay waxay ka digeen in 5.5 milyan oo qof ay weli u dhowdahay inay ku sii jiraan xaalad adag, iyadoo soo kabashada abaartuna la filayo inay qaadato waqti dheer.

Isuduwaha Gargaarka Bini’aadantinimo ee Qaramada Midoobay u qaabilsan Soomaaliya, George Conway, ayaa sheegay in xaaladda abaarta ay si weyn uga sii dartay, iyadoo uu jiro koror ku yimid qiimaha biyaha, sahayda cuntada oo xaddidan iyo maalgelinta gargaarka oo aad u yar.

Wuxuu carrabka ku adkeeyay in gargaar naf-badbaadin ah oo degdeg ah loo baahan yahay si looga hortago khasaare nafeed iyo burbur ku yimaada hab-nololeedyada xoolo-dhaqatada iyo beeraleyda.

Dhankiisa, Guddoomiyaha Hay’adda Maareynta Musiibooyinka Soomaaliyeed (SoDMA), Maxamuud Macallin Cabdulle, ayaa sheegay in dalku marayo “isgoys xasaasi ah,” iyadoo saameynta isbeddelka cimilada, barakaca iyo hoos u dhaca maalgelinta gargaarka ay si gaar ah u saameeyeen bulshooyinka nugul.

Abaartan ayaa daba socota roobab ka hooseeyay celceliska oo da’ay xilli roobaadkii Deyrta 2025 iyo kuleyl ka sarreeyay heerkii caadiga ahaa intii lagu jiray xilliga Jiilaalka ee hadda socda.

Xogta Qaramada Midoobay ayaa muujinaysa in wax-soo-saarka beeraha ee goosashadii u dambeysay uu ka yaraa boqolkiiba 80 celceliska muddada dheer, halka heerka taranka xooluhuna uu si weyn hoos ugu dhacay.

Qaramada Midoobay iyo dowladda Soomaaliya ayaa sidoo kale ka digay in dhimista maalgelinta ay ku khasabtay hay’adaha gargaarka inay yareeyaan ama hakiyaan barnaamijyada muhiimka ah ee cuntada, caafimaadka, nafaqada iyo biyaha, taasoo kordhinaysa halista sii xumaanshaha xaaladda haddii aan la helin taageero degdeg ah.