Muqdisho, Febraayo 24 (Dawan) – Dowladda Federaalka Soomaaliya ayaa maanta oo Talaado ah ku eedaysay burburka wadahadalladii ay la lahayd xubnaha mucaaradka oo sida ay sheegtay isbeddello “lama filaan ah” kusoo daray ajandihii lagu heshiiyay, taas oo keentay inay fashilmaan wadahadallo heer sare ah oo ujeeddadoodu ahayd xallinta ismari-waaga doorashooyinka dalka.
Wasaaradda Arrimaha Gudaha, Federaalka iyo Dib-u-heshiisiinta ayaa bayaan ay soo saartay ku sheegtay in wadahadallada, oo ka furmay caasimadda Muqdisho 18-kii Febraayo, loogu talagalay in lagu soo gabagabeeyo khariidadda doorashooyinka federaalka iyo kuwa dowlad-goboleedyada.
Sida ay sheegtay wasaaraddu, dowladda ayaa heshiis hordhac ah la gashay koox mucaarad ah oo loo yaqaan Golaha Mustaqbalka Soomaaliyeed, si diiradda loo saaro saddex qodob oo muhiim ah: dhisidda guddiga doorashooyinka federaalka, qabashada doorashooyinka dowlad-goboleedyada, iyo isugu yeerista shir kale oo dabagal ah bisha Abriil 2026.
“Dowladdu waxay u aragtaa wax laga xumaado in maalintii koowaad ee wadahadallada, xubno ka tirsan Golaha Mustaqbalka Soomaaliyeed ay si lama filaan ah u beddeleen ajandihii lagu heshiiyay,” ayay tiri wasaaraddu, iyadoo raacisay in mucaaradku ay keeneen dalabyo cusub oo aan lahayn “saldhig sharci iyo dastuur.”
Dowladda ayaa si gaar ah u xustay in dalabka mucaaradka ee ku lug lahaanshaha tooska ah iyo ka qaybgalka maamulka doorashooyinka dowlad-goboleedyada uu ahaa qodobka ugu weyn ee lagu kala aragti duwanaaday, iyadoo tallaabadaas ku tilmaantay mid xadgudub ku ah mabaadi’da dastuurka.
