Addis Ababa, Itoobiya – Hay’adaha amniga ee Itoobiya iyo Jabuuti ayaa ku dhawaaqay sameynta guddi wadajir ah oo loogu talagalay ka hortagga "xoogagga nabad-diidka" ee ka hawlgala xuduudaha labada dal. Tallaabadan ayaa lagu xaqiijiyay shir amni oo 23-kii Diseembar ka dhacay magaalada Addis Ababa, kaas oo ay yeesheen Hay’adda Sirdoonka iyo Amniga Qaranka ee Itoobiya (NISS) iyo Hay’adda Sirdoonka Jabuuti.
Sida lagu sheegay war-saxaafadeed ka soo baxay NISS, labada dal ayaa isku raacay in la geeyo ciidamo wadajir ah oo xuduudaha lagu xoojinayo, laguna dardargeliyo soo qabashada iyo celinta dambileyaasha ka gudba xuduudaha. Heshiiskaan ayaa sidoo kale xoojinaya wadaagista macluumaadka sirdoonka si loola dagaallamo khataraha ka jira xuduudaha.
Diiradda Lagu Saaray Xasilloonida GobolkaLabada dhinac ayaa sheegay inay muhiim tahay in si wadajir ah loola dagaallamo dambiyada xuduudaha, gaar ahaan tahriibinta dadka iyo hubka sharci-darrada ah, iyo sidoo kale qaxootiga aan sharciga lahayn. Arrintani waxay qeyb ka tahay qorshe guud oo lagu xoojinayo nabadda iyo xasilloonida gobolka.
Waxay sidoo kale isla garteen in la yareeyo caqabadaha amni ee saameynaya ganacsiga dhoofinta iyo soo dejinta Itoobiya, oo ka socda dekedda Jabuuti. Qorshahan ayaa muhiim u ah labada dal, maadaama ganacsiga ay wadaagaan uu yahay laf-dhabarta dhaqaalaha gobolka.
Guddi Cusub oo Lagu Wajahayo Dhibaatooyinka XuduudahaGuddi wadajir ah ayaa la sameeyay si loo dardargeliyo dadaallada lagu wajahayo khataraha xuduudaha. Waxay tani daba socotaa xiisado amni oo gobolka ku soo badanayay, kuwaas oo sababay kulamo isdaba joog ah oo u dhexeeya hay’adaha sirdoonka dalalka gobolka.
