Addis Ababa (Dawan)- Dowladda Itoobiya ayaa ku dhawaaqday in ay si buuxda uga guuleysatay xakameynta fayraska Marburg, kaddib markii aan la soo sheegin wax kiis cusub ah muddo 42 maalmood, sida ay xaqiijisay Hay’adda Caafimaadka Adduunka (WHO).
Tani waxay muujinaysaa guul caafimaad oo muhiim ah, kadib hawlgallo degdeg ah oo bilowday Noofembar 2025, markii cudurka markii ugu horreysay laga xaqiijiyay gobolka Koonfurta Itoobiya, gaar ahaan degmooyinka Jinka, Malle, Arba Minch iyo Hawassa ee gobolka Sidama.
Cudurkan halista ah ayaa sababay 14 kiis oo Marburg ah, kuwaas oo ay ku jiraan 9 dhimasho iyo 5 qof oo si buuxda u soo kabtay. Intaa waxaa dheer, waxaa jiray shan dhimasho oo kale oo lala xiriirinayo cudurka. Fayrasku waxa uu u dhigmaa Ebola, isagoo sababa qandho, matag, shuban, dhiigbax iyo dhibaatooyin kale oo caafimaad oo halis ah, iyadoo aan wali jirin talaal rasmi ah ama daaweyn loo heli karo.
Xakameynta degdegga ah ee cudurka waxaa iska kaashaday WHO, Wasaaradda Caafimaadka Itoobiya iyo Machadka Caafimaadka Dadweynaha. Hawlgallada ayaa diiradda saaray afar degmo oo si daran u saameysay cudurka, iyadoo 857 qof oo la xiriiray kiisaska la raadiyay muddo 21 maalmood ah, si loo joojiyo faafitaanka.
