Itoobiya sidee bay u aragtaa dhaxalka Islaamka?

Addis Ababa 20 December 2025- (Dawan)- Ra’iisul Wasaare Ku-xigeenka Itoobiya, Tamesgen Tiruneh, ayaa bogaadiyay doorka uu Matxafka Bilaal Al-Xabashi ka qaato diiwaangelinta taariikhda Islaamka ee Itoobiya, kaddib booqasho uu ku tagay matxafka oo ku yaalla degmada Mekanisa ee caasimadda Addis Ababa.

Tiruneh ayaa qoraal uu ku daabacay bartiisa rasmiga ah ee Facebook ku sheegay in aasaasaha matxafka, Bilaal Al-Xabashi, inuu dhisay xaruntan muhiimka si ay marag ugu noqoto sooyaalka Islaamka ee Itoobiya laga soo bilaabo hijradii koowaad ilaa xilligan casriga ah, isagoo xusay in taariikhda Islaamku ay tahay qayb aan ka go’i karin taariikhda qaranka Itoobiya.

Ra’iisul Wasaare Ku-xigeenka ayaa tilmaamay in matxafku leeyahay qiime taariikheed iyo mid dhaqan oo aad u sarreeya, isagoo xusay in Itoobiya ay ku yar yihiin xarumaha matxafyada ah ee si gaar ah diiradda u saara keydinta iyo soo bandhigista taariikhda Islaamka si nidaamsan oo dhammaystiran.

Waxa uu intaa ku daray in waxyaabaha yaalla matxafka ay ka tarjumaayaan marxalado muhiim ah oo ka mid ah taariikhda Islaamka ee Itoobiya, isagoo xusay in dalkiisu martigeliyay qaar ka mid ah asxaabtii Nebiga (NNKH), isla markaana uu ahaa goob ay ku barbaareen culimo caan ah, kuwaas oo qeyb ka qaatay faafinta islaamka iyo soo saaridda arday badan oo saamayn wayn ku leh gudaha dalka iyo daafaha dunida.

Sidoo kale, Tiruneh ayaa ka hadlay doorka uu Matxafku ka qaato taageerada bulshada, iyada oo dhallinyaro badan loo sameeyo tababaro, islamarkaan la dhiirigeliyo cilmi baarayaasha. Matxafku waxa uu sidoo kale ka qeyb qaata caawinta qoysaska tabaaleysan, iyada oo dhallinyarada qaar loo dhiso guryo sida uu sheegay Ra’iisul Wasaare Ku-xigeenka.

Ugu dambeyn, Ra’iisul Wasaare Ku-xigeenka ayaa sheegay in waayo-aragnimada Matxafka Bilaal Al-Xabashi ay tusaale u tahay sida hindiseyaasha dhaqan loogu beddeli karo aalado wax ku ool ah oo horumar bulsho keena, isagoo ku baaqay in la ilaaliyo dhaxalkan taariikheed lana taageero matxafka si loo xaqiijiyo sii jiritaanka doorkeeda ee ilaalinta sooyaalka Islaamka iyo xoojinta awoodda dhallinyarada ee Itoobiya.