Jaamacadda SIMAD oo kaalinta 1-aad ka gashay qiimeynta Jaamacadaha Soomaaliya

Muqdisho, 23 Diseembar 2025 (Dawan)- Jaamacadda SIMAD ayaa kaalinta koowaad ka gashay jaamacadaha ugu wanaagsan Soomaaliya sanadkii labaad oo xiriir ah, sida ku cad qiimeynta jaamacadaha Carabta ee sanadka 2025, oo ay sameeyeen Ururka Midowga Jaamacadaha Carbeed oo kanaashanaya Ururka Jaamacadda Carabta ee Waxbarashada, Dhaqanka iyo Sayniska.

Qiimeyntan, oo ay ku tartameen in ka badan 230 jaamacadood oo ku kala yaal wadamada Carabta, ayaa sidoo kale Jaamacadda SIMAD ka gelisay kaalinta 103-aad guud ahaan jaamacadaha Carabta, iyadoo 10 darajo kor ugu kacday marka la barbardhigo sanadkii hore, taasoo muujinaysa horumar joogto ah oo dhinaca tayada waxbarashada iyo cilmi-baarista ah.

Heer qaran, Jaamacadda Muqdisho ayaa gashay kaalinta labaad ee jaamacadaha Soomaaliya, balse 69 darajo ka hooseysa SIMAD marka loo eego qiimeynta Carabta, iyadoo ku jirta kaalinta 172-aad. Jaamacadda Jamhuuriya, oo kaalinta saddexaad ka gashay dalka, ayaa ku jirta kaalinta 218-aad, halka Jaamacadda Zamzam, oo afaraad ka noqotay Soomaaliya, ay gashay kaalinta 224-aad guud ahaan jaamacadaha Carabta.

Qiimeyntu waxay ku salaysnayd afar tiir oo waaweyn: tayada waxbarashada, cilmi-baarista, hal-abuurka, iyo doorka bulshada. Jaamacadda SIMAD ayaa heshay 182.4 dhibcood, taasoo ka dhigtay jaamacadda ugu sarreysa dalka marka la eego halbeegyadaas.

Guddoomiyaha Jaamacadda SIMAD, Dr. Cabdikariin Muxuddiin Axmed, oo la hadlay Dawan, ayaa sheegay in guushan ay ka dhalatay istaraatiijiyad fog iyo go’aan adag oo lagu horumarinayo tayada waxbarashada sare ee Soomaaliya.

“Guushan waxa ay ka tarjumaysaa in qorshayaasha aan dejinay, gaar ahaan dhinacyada tayada waxbarashada, xirfadaha, iyo cilmi-baarista, ay noqdeen kuwo wax ku ool ah” ayuu yiri Dr. Cabdikariin. Guddoomiyaha Jaamacadda SIMAD, waxuu raaciyay in aysan joojin doonin shaqada ay ardayda u hayaan, mar walbana u taagan yihiin horumarinta Jaamacadda iyo guud ahaan Soomaalida” waxaana ku dadaaleynaa inaan hubino in ardayda Soomaaliyeed ee SIMAD dhigata ay la tayo noqdaan kuwa caalamka. Waa shaqo adag balse waxaan diyaar u nahay inaan halkaas ka sii wadno” ayuu hadalkiisa raaciyay

Horumarkaan ayaa ah mid ka tarjumaya heerka sare ee waxbarashada ee Soomaaliya, iyada oo Jaamacadda SIMAD ay noqotay hormuudka waxbarashada sare ee dalka, taasoo muujinaysa muhiimadda dadaalada lagu horumarinayo aqoonta iyo xirfadaha dhalinyarada.

“Guushaan waxa ay nagu dhiirrigalineysaa inaan sii wadno kaalinta aan bulshada Soomaaliyeed ugu jirno. Waxaan sii wadi doonaa in aan xoogga saarno horumarinta waxbarashada iyo cilmi-baarista” ayuu yiri gudoomiyaha, waxa uu sidoo kale balan qaaday in Jaamacadda iyo waxbarshada dalka ay gaarsiin doonaan heer ay u dhiganto kuwa ugu sarreeya caalamka “Waxaan sidoo kale ka shaqeyn doonaa in aan sii ballaarinno iskaashiga caalamiga ah, si aan Jaamacadda SIMAD uga dhigno goob waxbarasho oo caalami ah,” ayuu kusoo gabagabeeyay hadalkiisa Dr. Cabdikariin.

Jaamacadda SIMAD, oo la aasaasay sanadkii 1999, ayaa sanadihii u dambeeyay sameyneysay horumar muuqda oo dhinacyada waxbarashada iyo cilmi-baarista ah, iyada oo malaayiin doollar ku maalgelisay kor u qaadista aqoonta iyo hal-abuurka. Guushan labaad ee xiriirka ah ayaa Jaamacadda SIMAD ka dhigtay hormuudka waxbarashada sare ee Soomaaliya, iyada oo astaan u noqotay isbeddelka iyo kororka tayada jaamacadaha dalka.