Jabuuti (Dawan)- Magaalada Jabuuti ayaa martigelisay munaasabad ballaaran oo lagu daah-furayay barnaamij lagu taageerayo haweenka dhaqaalaha ahaan nugul, kaas oo lagu horumarinayo xirfadaha 1,000 dumar ah. Munaasabaddan, oo ay soo qabanqaabisay Wasaaradda Haweenka ee Jabuuti, waxaa taageero ka geystay Bangiga Adduunka iyo Dowladda Japan.
Barnaamijkan ayaa loo qorsheeyay sidii kor loogu qaadi lahaa awoodda dhaqaale ee haweenka, iyadoo xoogga la saarayo kuwa ugu nugul bulshada. Wajiga koowaad ee mashruuca ayaa diiradda saaraya in dumarka dhaqaalahoodu hooseeyo ay helaan fursado xirfadeed oo kobcinaya noloshooda.
Sida ay sheegtay Wasaaradda Haweenka ee Jabuuti, ujeedada ugu weyn ee mashruucu waa in la dhiso nolol cusub oo rajo iyo yididiilo ku dhisan, iyada oo la xoojiyo madaxbannaanida dhaqaale ee haweenka.
Saameynta iyo Faa’iidada Barnaamijka
Barnaamijkan wuxuu leeyahay saameyn togan oo ballaaran, iyadoo looga gol-leeyahay:
Munaasabadda furitaanka waxaa goob joog ka ahaa masuuliyiin heer sare ah oo ka kala socday Bangiga Adduunka iyo Dowladda Japan. Wasiirka Haweenka Jabuuti, Muna Cismaan Aadan oo khudbad ka jeedisay goobta, ayaa tilmaantay in mashruucan yahay tallaabo muhiim ah oo ku aaddan xaqiijinta horumarka haweenka iyo buuxinta baahiyahooda dhaqaale.
Fatou Fall, wakiilka Bangiga Adduunka, ayaa iyaduna carrabka ku adkeysay sida ay Bangiga Adduunka uga go’an tahay taageerida barnaamijyada noocan ah, waxayna ku tilmaantay mashruucan mid muhiim u ah horumar waara, maadaama dumarku yihiin laf-dhabarta bulshooyinka.
Wasaaradda Haweenka ayaa sidoo kale ballan-qaaday in barnaamijkan uu noqon doono mid lasii ballaariyo oo gaaraya haweenka kale ee dalka, si loo xaqiijiyo sinnaanta iyo horumarka dhamaan qeybaha bulshada.
Barnaamijkan wuxuu astaan u yahay sida wada-shaqeynta caalamiga ah u taageeri karto horumarka bulshada, gaar ahaan kuwa dhaqaalaha ahaan ugu nugul, taas oo keeni karta isbeddel waara oo guul laga gaaro.
