Jabuuti iyo Masar oo dib u eegay mashaariic dhanka gaadiidka, tamarta iyo saadka ah

Egypt, 28, September 2025 – Maamulka Dekedaha iyo Aagagga Xorta ah ee Jabuuti (DPFZA) ayaa sheegay in guddoomiyaha maamulka Abuukar Cumar Haadi uu kulan kula yeeshay Wasiirka Gaadiidka Masar, Kamel El-Wazir, magaalada Qaahira Jimcihii si dib loogu eego mashaariic horay loo saxiixay oo la xiriira gaadiidka, saadka iyo tamarta.

Maamulka Dekadaha ayaa sidoo kale sheegay in Safiirka Jabuuti ee Masar, Axmed Cali Barreh, uu ka qaybgalay wadahadallada ka dhacay Magaalada Cusub ee Maamulka ee Qaahira.

Mashaariicda laga hadlay waxaa ka mid ahaa kaabayaasha cusub ee dekedaha, waddooyin, mashaariicda tamarta qoraxda iyo dabaysha, iyo aag saadka ah oo dhulkiisu dhan yahay 10 hektar kana tirsan Aagga Ganacsiga Xorta ah ee Caalamiga ah ee Jabuuti.

Hay’adda ayaa intaas ku dartay in laan ka tirsan Akadeemiyada Carabta laga aasaasi doono Jabuuti si kor loogu qaado tababarka iyo horumarinta xirfadaha.

“Kulankan waa tallaabo lagu xoojinayo iskaashiga laba geesoodka ah iyo horumarinta isdhexgalka gobolka,” ayuu Maamulka ku yiri bayaan uu soo dhigay bartiisa X.

Jabuuti, oo ku taalla isgoyska maraakiibta Badda Cas ee Geeska Afrika, ayaa dhowr mar sheegtay inay ballaarinayso kaabayaasha si ay u xoojiso kaalinteeda xarunta saadka ee gobolka.