Jabuuti iyo Midowga Yurub oo kala saxiixday heshiisyo €7 milyan ah

Jabuuti, 29 Sebteembar 2025 – Dowladda Jabuuti ayaa Axaddii kala saxiixatay Midowga Yurub laba heshiis oo maalgelin ah oo wadartoodu dhan tahay €7 milyan (u dhiganta $7.6 milyan), kuwaas oo lagu taageerayo horumarinta bulshada iyo dhaqaalaha, isla markaana lagu xoojinayo hirgelinta siyaasadaha guud ee mudnaanta leh.

Heshiisyadan waxaa magaalada Jabuuti ku kala saxiixday Wasiirka Maaliyadda Ilyas Moussa Dawaleh, Wasiirka Arrimaha Bulshada Muuna Cusmaan, iyo Safiirka Midowga Yurub ee Jabuuti, Dr. Denisa Elena-Ionete.

Wasiir Dawaleh oo ku dhawaaqay heshiisyada ayaa sheegay in €5 milyan lagu bixin doono barnaamijyada daryeelka bulshada iyo horumarinta dhaqaalaha, halka €2 milyanna lagu taageeri doono kormeerka iyo hirgelinta siyaasadaha guud.

Wasiirka Haweenka iyo Arrimaha Qoyska, Muuna Osman Aden, ayaa sheegtay in barnaamijkan cusub uu daba socda maalgelin hore oo dhan $7 milyan oo Midowga Yurub uu horey u bixiyay. “Midowga Yurub wuxuu maanta ansixiyay mashruuc kale oo xoojinaya barnaamijkii aan hore u fulinaynay, kaas oo socon doona dhowr sano,” ayay tiri.

Safaaradda Midowga Yurub ee Jabuuti ayaa ku tilmaantay heshiisyadan “iskaashi adag oo taageeraya qorshaha Jabuuti 2035,” iyagoo xusay ballanqaadyo lagu xoojinayo iskaashiga horumarineed iyo dagaalka lagula jiro gudniinka fircooniga (FGM).