Jabuuti oo heshay casuumaadda ka qaybgalka Shirweynaha Jaamacadda Carabta

Djibouti City, Djibouti – Wasiirka Arrimaha Gudaha ee Ciraaq, Abdul Amir Al-Shammari, ayaa booqasho rasmi ah ku tagay dalka Jabuuti 25 April 2025, halkaas oo uu kulan kula yeeshay Wasiirka Arrimaha Gudaha ee Jabuuti, Saciid Nuux Xasan.

Booqashadan ayaa diiradda saartay xoojinta xiriirka labada dal, iyadoo labada wasiir ay ka wada hadleen sidii loo horumarin lahaa iskaashiga istiraatiijiga ah ee dhinacyada ammaanka iyo ka hortagga khataraha caalamiga ah.

Sida lagu sheegay qoraal kasoo baxay Wasaaradda Arrimaha Gudaha ee Jabuuti, Wasiir Saciid Nuux Xasan ayaa muujiyay go'aan adag oo ku saabsan dhisidda aasaaska iskaashi xooggan oo dhex mara labada wasaaradood. Waxa uu carrabka ku adkeeyay muhiimada wada-shaqeynta si loo xoojiyo amniga iyo nabadgelyada gobolka.

“Wasiir Said Nouh Hassan ayaa muujiyay diyaaraddiisa ah inuu dhiso aasaaska iskaashi xooggan oo ka dhexeeya wasaaradaha arrimaha gudaha ee labada dal,” ayaa lagu yiri qoraalka Wasaaradda Arrimaha Gudaha ee Djibouti.

Intii kulanka socday, Wasiir Al-Shammari wuxuu si rasmi ah ugu gudbiyay Wasiirka Arrimaha Gudaha ee Jabuuti casuumaad ka timid Madaxweynaha Jamhuuriyadda Ciraaq, Abdul Latif Jamal Rashid, oo ku saabsan ka qaybgalka Shirweynaha 34-aad ee Jaamacadda Carabta oo lagu qaban doono magaalada Baghdad 17-ka May 2025.