Jabuuti - Wasiirka Arrimaha Gudaha ee Jabuuti, Saciid Nuux, ayaa ku dhawaaqay in la mamnuucay in hub lala soo galo guud ahaan gobollada iyo deegaanada dalka, isagoo digniin culus u diray dadka reer guuraaga ah ee ka imaanaya dalalka deriska la ah.
Wasiirka oo shir jaraa’id qabtay ayaa caddeeyay in talaabadani ay tahay mid lagu xaqiijinayo nabadda iyo xasilloonida dalka. “Waa mamnuuc in hub lala soo galo Jabuuti, cid walba oo lagu qabtana waxa ay hortagi doontaa garsoorka,” ayuu yiri.
Saciid Nuux ayaa si gaar ah farta ugu fiiqay dadka ka imanaya dalalka deriska la ah, isaga oo ku amray in aysan hub la iman karin. Wuxuu faray ciidamada xuduudaha in ay si degdeg ah ula wareegaan hubka laga helo dad aan sharciyad u haysan in ay dalka la soo galaan.
Wasiirka ayaa sidoo kale shaaciyay in ciidamada kala duwan ee Jabuuti ay dhawaan fulin doonaan howlgallo ka dhan ah dadka sida sharci darrada ah hubka ula soo galaya dalka.
