JABUUTI, 01 Oktoobar 2025 – Madaxtooyada Jabuuti ayaa Talaadadii sheegtay in Maxkamadda Caalamiga ah ee Xallinta Khilaafaadka ee London (LCIA) ay gebi ahaanba diiday dacwad ku dhow $1 bilyan oo shirkadda DP World ee laga leeyahay Imaaraadka Carabta ka gudbisay Jabuuti, taas oo la xiriirtay joojintii heshiiska dekedda Doraleh sanadkii 2018.
Sida lagu sheegay war-saxaafadeed rasmi ah Talaadadii, maxkamaddu waxay caddeysay in shirkadda Port de Djibouti SA (PDSA), oo ahayd dhinaca lagu bartilmaameedsaday dacwadda, aanay mas’uul ka ahayn maadaama joojinta heshiiska DP World ay ahayd go’aan qaran oo dowladeed.
Sanadihii la soo dhaafay, dacwado iyo xukuno is khilaafsan ayaa soo maray maxkamadaha caalamiga ah oo labada dhinac wadeen. Sannadkii 2019, maxkamadda London ayaa Jabuuti ku amartay in ay bixiso $474 milyan, go’aan ay dowladda diiday. Bishii Febraayo 2023, maxkamad Mareykan ah ayaa dhinac u xukuntay DP World, balse bishii July 2024 Maxkamadda Racfaanka Mareykanka ayaa meesha ka saartay xukunkaas.
Bayaanka Madaxtooyada ayaa ku tilmaamay go’aankan “guul sharciyeed muhiim ah.” Waxaa lagu yiri: “Go’aankani waxa uu mar kale xaqiijinayaa xuquuqda sharciga ah ee Jamhuuriyadda Jabuuti. Waxa uu fashiliyey istiraatiijiyadda DP World ee ku tiirsaneyd maxkamado iyo cadaadis warbaahineed.”
Sidoo kale, Jabuuti waxay sheegtay in DP World lagu amray inay bixiso dhammaan kharashaadka maxkamadda, isla markaana magdhaw ahaan ugu soo celiso $1.85 milyan oo doollar oo ku baxay qarashaadka sharci ee shirkadda dacwadda lagu oogay.
Dowladda Jabuuti ayaa sidoo kale ku adkaysatay in khilaafka lagu xallin karo oo keliya wada-hadal toos ah oo dhex mara dowladda iyo DP World, iyadoo la ilaalinayo madaxbannaanida qaranka iyo kaabeyaasha istiraatiijiga ah
Dekedda Doraleh, oo la furay 2009, ayaa weli ah il dhaqaale oo muhiim u ah Jabuuti, iyadoo sanad walba qaadi karta ilaa 1.6 milyan oo konteenar. Murankan oo muddo dheer soo jiitamayay ayaa weli loo arkaa mid ka mid ah khilaafaadka dekedaha ugu saamaynta badan Geeska Afrika.