Jabuuti oo Si Diiran u Soo Dhoweysay Ciidamada Hiil Walaal 10

📍 Jabuuti – 15 Abriil 2025

Dowladda Jabuuti ayaa si rasmi ah u soo dhaweysay guutada Hiil Walaal 10, oo muddo laba sano ah ka qeyb ahayd howlgalka nabad ilaalinta ee Soomaaliya ee ay hogaaminaysay ATMIS (African Union Transition Mission in Somalia).

Ciidamadan, oo si sharaf leh dib ugu laabtay dalkooda, ayaa lagu soo dhaweeyay garoonka diyaaradaha ee Jabuuti iyadoo ay halkaasi ku sugnaayeen Wasiirka Gaashaandhigga Jabuuti, Hassan Cumar Maxamed Burhaan, iyo Taliyaha Ciidamada Qalabka Sida, Sakariya Sheikh Ibraahim.

Kadib markii ay dalka soo galeen, waxaa ciidamada laga qaaday baadhitaanno caafimaad si loo xaqiijiyo badqabkooda, iyagoo soo maray nidaamyo caafimaad oo rasmi ah.

Jabuuti ayaa ka mid ahayd dalalka sida dhow ula garab taagnaa Soomaaliya dadaallada nabad-ilaalinta, tan iyo markii ay ciidamadoodu yimaadeen Soomaaliya bishii December ee 2011.

Wadamada kale ee ka qeyb qaata howlgalka nabad ilaalinta Soomaaliya waxaa ka mid ah Uganda, Burundi, Ethiopia, iyo Kenya. Waxaa hadda socda qorshe ATMIS loogu beddelayo AUSSOM – howlgal cusub oo ay hoggaamin doonto Dowladda Federaalka Soomaaliya.