Jabuuti oo soo dhaweysay baaqyada wadahadallada Koonfurta Yemen

Jabuuti (Dawan)– Jamhuuriyadda Jabuuti ayaa si rasmi ah u soo dhoweysay wadahadallada uu ku baaqay Madaxweynaha Golaha Hoggaaminta Yemen, Rashaad al-Calimi, kuwaas oo la qorsheeyay in lagu qabto magaalada Riyaad, isla markaana diiradda lagu saarayo xaaladda cakiran ee Koonfurta Yemen iyo sidii loo xoojin lahaa amniga, midnimada, iyo wadajirka dalka Yemen.

War ka soo baxay Wasaaradda Arrimaha Dibadda Jabuuti ayaa lagu sheegay in baaqa wadahadalladu uu yahay tallaabo muhiim ah oo horseedi karta dib-u- soo nooleynta wadahadal qaran oo dhammaystiran, laguna wajihi karo caqabadaha siyaasadeed iyo kuwa amni ee muddada dheer ka taagnaa Koonfurta Yemen.

Jabuuti, oo ah dal deris la ah Yemen, ayaa tilmaamtay in xasilloonida Yemen ay si toos ah ula xiriirto amniga iyo nabadda guud ee Geeska Afrika iyo Badda Cas.

Dowladda Jabuuti ayaa hoosta ka xariiqday in kulanka Riyaad uu yahay fursad qaali ah oo lagu soo afjari karo kala aragti duwanaanshaha siyaasadeed, laguna yareyn karo xiisadaha colaadeed ee ka aloosan Koonfurta Yemen, iyadoo ku baaqday in dhammaan dhinacyada siyaasadeed ay ka qayb qaataan wadahadal furan oo wax ku ool ah.

Baaqan wadahadallada ayaa imanaya kaddib markii xoogagga Guddiga Kala-guurka Koonfurta Yemen, ay shaaciyeen mowqif ay kaga soo horjeedaan dowladda dhexe, iyaga oo xusay go’aan ay kaga baxayaan Yemen, arrintaas oo sii hurisay xiisadda siyaasadeed isla markaana dedejisay baahida loo qabo kulan degdeg ah.

Go’aankaasi waxa uu daba socday khilaafyo xooggan oo ka taagnaa gobolka Khaliijka, kuwaas oo Imaaraadka Carabta horey loogu eedeeyay inuu taageero u fidinayo dadaallada gooni-u-goosadka Koonfurta Yemen, inkasta oo ay eedeyntaas gaashaanka u daruurtay.

Sacuudiga ayaa dhankiisa muujiyay diyaar garow buuxa oo uu ku martigelinayo shirka Riyaad, kaas oo la filayo in ay ka soo qayb galaan dhammaan dhinacyada siyaasadeed ee Yemen. Riyadh ayaa door muhiim ah ka qaadata taageerada amni iyo xoojinta awoodaha difaac ee Yemen, taas oo shirka siinaysa miisaan gaar ah.

Ugu dambayn, Xukuumadda Jabuuti ayaa ku boorrisay dhammaan dhinacyada Yemen inay ka fogaadaan tallaabooyin hal dhinac ah ama isbeddello amni oo dhaawici kara fursadaha lagu gaari karo xal siyaasadeed oo waara, iyadoo carrabka ku adkaysay in wadahadal iyo is-afgarad qaran ay yihiin waddada kaliya ee lagu gaari karo nabad iyo xasillooni Yemen ka hanaqaadda.