James Swan oo soo gabagabeeyay joogitaankiisa Soomaaliya

New York Maarso 6, 2026 (Dawan)– Xoghayaha Guud ee Qaramada Midoobay, António Guterres, ayaa Khamiistii u magacaabay James Swan inuu noqdo Ergeyga Gaarka ah ee Jamhuuriyadda Dimuqraadiga ah ee Congo (DRC), isla markaana uu hoggaamin doono howlgalka nabad-ilaalinta ee MONUSCO.

“Mudane Swan waa diblomaasi khibrad leh oo muddo dheer ka soo shaqeeyay dalalka Afrika ee wajahaya isbeddello qalafsan oo dhinaca siyaasadda iyo amniga ah,” ayay Qaramada Midoobay ku tiri qoraal ay soo saartay.

Swan, oo ah diblomaasi sare oo Mareykan ah, ayaa xilkan loo magacaabay isagoo markii hore hoggaaminayay Howlgalka Kumeelgaarka ah ee Qaramada Midoobay ee Kaalmada Soomaaliya (UNTMIS), kaas oo la aasaasay Maarso 28, 2025.

Magacaabistaas xilligaas waxay timid kaddib markii uu muddo ku-sime u ahaa howlgalka tan iyo bartamihii sanadkii 2024, isaga oo kormeerayay kala-guurka u dhexeeya howlgalkii hore ee UNSOM iyo midka cusub ee UNTMIS.

Magacaabistan cusub ee Congo ayaa timid xilli Soomaaliya ay ku jirto marxalad kala-guur ah oo ku aaddan joogitaanka Qaramada Midoobay, kaddib markii dowladda federaalku codsatay in la soo afjaro howlgalkii hore ee UNSOM, kaas oo lagu beddelay kan hadda jira.

Maxamed Cabdi Waare, Ku-xigeenka Xoghayaha Fulinta ee urur-goboleedka IGAD, ayaa ku tilmaamay bixitaanka Swan “khasaaro weyn” oo soo gaaray Soomaaliya, isaga oo ammaanay xirfaddiisa iyo degganaantiisa muddadii uu ka shaqeynayay Muqdisho.

Waare ayaa xusay in Swan uu ahaa qof horseed ka ahaa dadaallada caalamiga ah ee lagu xasilinayo dalka.“James si hufan ayuu u hoggaamiyay howlgalada UNSOM iyo UNTMIS ee Soomaaliya muddo sannado ah,” ayuu yiri Waare. “Dabeecaddiisa deggan, rajo-wanaaggiisa aan xadka lahayn iyo xirfaddiisa hufan waxay faa’iido weyn u noqon doonaan Jamhuuriyadda Dimuqraadiga ah ee Congo.”

Swan ayaa Soomaaliya ka soo shaqeeyay xilliyo kala-guur ah, isaga oo door ka qaatay dhexdhexaadintii doorashooyinkii 2020–2022. Magacaabistiisa cusub ee DRC waxay dib ugu celinaysaa dal uu hore uga soo ahaa Safiirka Mareykanka intii u dhaxaysay 2013 ilaa 2016.

Xafiiska Qaramada Midoobay ayaan weli ku dhawaaqin qofka rasmiga ah ee beddelaya Swan si uu u hoggaamiyo wejiga kala-guurka ah ee howlgalka Soomaaliya, kaas oo qorshuhu yahay in lagu soo gabagabeeyo dabayaaqada sannadka 2026.