Jarmalka oo Soomaaliya oo ku taageeray 75 Milyan oo Yuuro

Soomaaliya, 28 Oktoobar 2025 — Soomaaliya iyo Jarmalka ayaa soo gabagabeeyay laba maalmood oo wada-hadallo iskaashi horumarineed ah oo ka dhacay Muqdisho, kuwaasoo Jarmalku ku taageereen 75 milyan oo Yuuro (qiyaastii 80 milyan oo Dollar) si loo taageero horumarka bulshada iyo dhaqaalaha Soomaaliya muddada laba sano ee soo socota.

Heshiiskan, oo ay saxiixeen Wasiirka Qorsheynta, Maalgashiga, iyo Horumarinta Dhaqaalaha Soomaaliya, Maxamuud Cabdiraxmaan Beene Beene, iyo wakiilo ka socday Wasaaradda Horumarinta Dhaqaalaha ee Jarmalka (BMZ), ayaa diiradda saaraya waxbarashada, gaar ahaan barashada farsamada iyo xirfadaha (TVET), maaraynta biyaha, beeraha, iyo horumarinta reer miyiga.

Wasiir Beene Beene ayaa sheegay in maalgelintan ay muujinayso xiriirka taariikhiga ah ee Jarmalka iyo Soomaaliya, oo soo bilowday 1961, isla markaana ay ka tarjumayso taageerada Berlin ay u fidiso Qorshaha Isbeddelka Qaranka ee shanta sano ee soo socota iyo dib-u-habaynta dhaqaalaha Soomaaliya.

“Heshiiskan waxaa loogu talagalay laba sano oo soo socda,” ayuu yiri Wasiir Beene Beene. “Anigoo ku hadlayo magaca Dowladda Soomaaliya iyo shacabka Soomaaliyeed, waxaan rabaa inaan u mahadceliyo Dowladda Jarmalka iyo shacabka Jarmalka, oo mar kasta Dowladda Soomaaliya ku garab istaaga wada shaqeynta iyo taageerada mashaariicda horumarineed.”

Sida uu sheegay wasiirku, qaabka cusub ee iskaashiga ayaa qayb ka ah wada-tashiyada horumarineed ee labada sano mar ee Soomaaliya iyo Jarmalka, kuwaasoo dib u eegis ku sameeya mashaariicda socda iyo dejinta mudnaanta cusub ee maalgelinta. Mashaariicdii hore ee Jarmalka ayaa taageeray waxbarashada, tababarka xirfadaha, tamarta la cusboonaysiin karo, iyo dib-u-habaynta maamulka.

Mas’uuliyiinta ayaa xaqiijiyay in lacagta la ballanqaaday lagu bixin doono si dhaqso ah, mashruucyada socdaana loo dardargeliyo illaa labada sano ee soo socota.

Wasiirka Qorsheynta Soomaaliya ayaa sheegay in heshiiskan uu ka caawin doono in maalgelinta deeq-bixiyeyaasha si habsami leh ugu waafaqdo mudnaanta horumarineed ee dalka, si taageeradu si toos ah uga qeyb qaadato kobaca waara iyo horumarka bulshada.