Kenya, 02 Oktoobar 2025 (Dawan Africa) – Madaxweynayaasha Jubbaland iyo Puntland ayaa Khamiistii magaalada Nairobi kula kulmay hoggaamiyeyaasha mucaaradka si ay uga wada hadlaan mustaqbalka siyaasadeed ee Soomaaliya, iyagoo ku dhawaaqay qorshe lagu dhisayo “Golaha Mustaqbalka Soomaaliya.”
Kulanka waxaa ka qayb galay Madaxweynaha Jubbaland Axmed Maxamed Islaam “Madoobe,” Madaxweynaha Puntland Saciid Cabdullaahi Deni, iyo xubno ka tirsan Madasha Samatabixinta Qaranka ee mucaaradka, oo ay matalayeen Ra’iisul Wasaarihii hore Xasan Cali Khayre, Ra’iisul Wasaarihii hore Cabdi Faarax Shirdoon iyo Xildhibaan Cabdiraxmaan Cabdishakuur.
Bayaankii wadajirka ahaa ee laga soo saaray kulanka ayaa lagu sheegay in golahan cusub uu mideyn doono maamul goboleedyada Jubbaland iyo Puntland iyo mucaaradka, si loo hago marxaladda kala guurka siyaasadeed ee dalka. “Waxaan isla garanay dhismaha Golaha Mustaqbalka Soomaaliya, oo mideyn doona Madasha Samatabixinta Qaranka iyo maamulada Jubbaland iyo Puntland,” ayaa lagu yiri bayaanka.
