Ka dib rabshadihii Boorama: Madaxweyne Ku-xigeenka oo difaacay ka mid ahaansha Awdal ee Somaliland

Boorama (Dawan)– Madaxweyne Ku-xigeenka Somaliland, Maxamed Cali Aw Cabdi, ayaa si adag u beeniyay wararka sheegaya in Gobolka Awdal uusan ka mid ahayn Somaliland, isaga oo ku tilmaamay hadalladaas “been-abuur” ay faafinayaan kooxo dano gaar ah leh.

Isagoo khudbad ka jeedinayay magaalada Boorama, oo uu ku tagay safar shaqo Sabtidii, ayuu Madaxweyne Ku-xigeenku sheegay in aysan jirin wax kala fogaansho ah oo u dhexeeya Awdal iyo Somaliland, isla markaana midnimada Somaliland aysan ahayn arrin la isku haysto.

“Nin dano gaar ah wato oo idin yiraahda ‘Somaliland ma aha Awdal’ waa been, waa been,” ayuu yiri, isagoo meesha ka saaray dood kasta oo la xiriirta in Awdal laga reebo Somaliland.

Hadallada Madaxweyne Ku-xigeenka ayaa imanaya kaddib rabshado bishii la soo dhaafay ka dhacay magaalada Boorama, kuwaas oo dhexmaray ciidamada Somaliland iyo dad rayid ah, isla markaana sababay dhimasho iyo dhaawac. Rabshadahaas ka sokow, Boorama waxaa ka dhacay mudaharaadyo looga soo horjeeday aqoonsi ay Somaliland ka heshay Israa’iil, iyadoo dibadbaxayaashu wateen calanka Falastiin.

Madaxweyne Ku-xigeenka Somaliland ayaa tacsi u diray qoysaska dadkii ku dhintay rabshadihii Boorama, isaga oo sheegay in uu aad uga xumaaday dhacdooyinkaas xilli uu safar dibadda ah ku maqnaa. Waxa uu sidoo kale u rajeeyay caafimaad degdeg ah dadka ku dhaawacmay, isagoo ugu baaqay shacabka Gobolka Awdal in ay ilaaliyaan nabadda iyo amniga, oo uu ku tilmaamay tiirka ugu muhiimsan ee nolosha iyo horumarka bulshada.