Kaddib dib u dhigistii doorashada.. Cirro oo la kulmay xisbiyada siyaasadda

Somaliland (Dawan) — Madaxweynaha Somaliland, Cabdiraxmaan Maxamed Cabdillaahi (Cirro), ayaa shalay kulan la yeeshay Komishanka Doorashooyinka Somaliland iyo hoggaanka sare ee saddexda xisbi qaran ee kala ah WADDANI, KAAH iyo KULMIYE, si looga wada hadlo qabanqaabada doorashooyinka Golaha Wakiillada iyo Goleyaasha Deegaanka.

Doorashooyinkan ayaa horay u muddeeysnaa 31-ka May 2026, balse waxaa la go’aamiyay in dib loo dhigo muddo 10 bilood ah, kaddib qiimeyn lagu sameeyay xaaladda guud ee dalka.

Kulanka ayaa si gaar ah diiradda u saaray xoojinta wada-shaqeynta siyaasadeed, iyo ka tashiga waqtiga, habraaca iyo duruufaha ugu habboon ee ay doorashooyinku ku qabsoomi karaan. Madaxweynaha Somaliland ayaa sheegay in xaaladaha amni ee deegaanno ka mid ah dalka, iyo abaaraha baahsan ee saameeyay nolosha bulshada, ay caqabado waaweyn ku yihiin qabsoomidda doorashooyinka waqtigii loo qorsheeyay.

Dhankiisa, Komishanka Doorashooyinka Somaliland ayaa si rasmi ah u shaaciyay in doorashooyinka Golaha Wakiillada iyo Goleyaasha Deegaanka ee la qorsheeyay 31-ka May 2026 aysan suurtagal ahayn in la qabto waqtigaas, sababo la xiriira caqabado farsamo iyo kuwo amni.

Komishanku wuxuu tilmaamay arrimo dhowr ah oo sababay dib-u-dhigista, kuwaas oo ay ka mid yihiin abaaraha baahsan ee saameeyay dadka iyo duunyada, xaaladaha amni ee deegaanno gaar ah, iyo kala aragti duwanaansho siyaasadeed oo la xiriira hannaanka diiwaangelinta codbixiyayaasha. Waxa uu intaa ku daray in dib-u-habeynta diiwaangelinta codbixiyayaasha ay qaadan doonto muddo 10 bilood ah, laga bilaabo 31-ka May 2026.

Madaxweynaha Somaliland ayaa sidoo kale caddeeyay in xukuumaddiisu ay diyaar u tahay bixinta dhaqaalaha loo baahan yahay si loo xaqiijiyo qabsoomidda doorashooyinka marka waqtigooda la gaadho. Waxaa xusid mudan in Xisbiga KAAH uu soo jeediyay in dib loo eego hannaanka diiwaangelinta codbixiyayaasha, si loo hubiyo in doorashooyinka ay u dhacaan si hufan oo la wada aqbali karo.