Kalluumaysiga Soomaaliya oo gacanta loo geliyay shirkad cusub

Ankara 18 December 2025 (Dawan)- Wasaaradda kalluumeysiga iyo dhaqaalaha buluugga Soomaaliya iyo Ururka Warshadaha Turkiga ee OYAK ayaa heshiis istiraatiiji ah ku aasaasay shirkad cusub oo lagu magacaabo SOMTURK, taas oo loo xilsaaray maamulka iyo bixinta dhammaan oggolaanshaha kalluumeysiga ee biyaha Soomaaliya.

Heshiiskan, oo la saxiixay 16-ka December 2025, ayaa dhigaya in SOMTURK ay noqoto hay’adda kaliya ee mas’uulka ka ah habraacyada shati-siinta, kormeerka iyo nidaaminta hawlaha kalluumeysiga gudaha, iyadoo ujeedadu tahay in la helo hannaan hufan oo mideysan, laguna ilaaliyo khayraadka badda Soomaaliya.

Mas’uuliyiinta labada dhinac ayaa sheegay in SOMTURK ay door muhiim ah ka qaadan doonto horumarinta dhaqaalaha buluugga ah, kobcinta shaqo-abuurka, iyo soo jiidashada maalgashi casri ah, isla markaana ay fududeyn doonto ka-qeybgalka shirkadaha kalluumeysiga Turkiga ee suuqyada Soomaaliya.

Heshiiskan ayaa lagu tilmaamay mid xoojinaya iskaashiga istiraatiijiga ah ee Soomaaliya iyo Turkiga ee dhinaca khayraadka badda, isla markaana dhidibada u taagaya qaab cusub oo lagu maareeyo kalluumeysiga, laguna hubiyo in faa’iidadiisa ay gaarto dhaqaalaha gudaha iyo bulshooyinka ku tiirsan badda.

Soomaaliya iyo Turkiga waxa ay leeyihiin xiriir dhaqaale, diblomaasiyadeed iyo mid milatari tan iyo booqashadii uu Soomaaliya ku yimid Madaxweynaha Turkiga, Recep Tayyip Erdoğan sanadkii 2011, taasoo ahayd booqashadii ugu horreysay ee uu hoggaamiye aan Afrikaan ahayn ku tago Soomaaliya muddo ka badan 20 sano.

Turkigu waxa uu ku tilmaama xiriirkan mid ku dhisan mabda’a iskaashi faa’iido wadaag ah iyadoo Hay’adda Iskaashiga iyo Isuduwidda Turkiga (TIKA) ay tan iyo 2011 ka hirgelisay gudaha Soomaaliya in ka badan 150 mashruuc oo horumarineed. Sidoo kale, Turkigu waxa uu Muqdisho ku leeyahay safaaradda ugu weyn qaaradda Afrika iyo saldhi milatari oo loogu talagalay tababarka Ciidanka Xoogga Dalka Soomaaliyeed.