Nairobi (Dawan) – Dowladda Keniya iyo Boqortooyada Ingiriiska ayaa kala saxiixday heshiis iskaashi oo cusub, kaas oo ujeedkiisu yahay xoojinta amniga xuduudaha, la-dagaallanka argagixisada iyo dambiyada ka gudba xuduudaha, iyo taageeridda xasilloonida gobollada xuduudaha u nugul. Tallaabadan ayaa muujineysa siduu usii xoogaysatay iskaashiga istiraatiijiga ah ee u dhexeeya Nairobi iyo London.
Heshiiskan ayaa jawaab ka bixiyay walwalka sii kordhaya ee khataraha ka gudba xuduudaha, sida argagixisada, tahriibka dadka, iyo shabakadaha dambiyada abaabulan ee ka howlgala xuduudaha muhiimka ah, gaar ahaan kuwa Keniya–Soomaaliya iyo Keniya–Itoobiya.
Wakilka Wasaaradda Amniga Gudaha iyo Maamulka Qaranka ee Keniya, Dr. Raymond Omulo, ayaa sheegay in heshiisku uu cadeynayo go’aanka dowladda Keniya ee ku aaddan ilaalinta madax-bannaanida dalka, isla markaana lagu xoojinayo amniga iyo horumarka bulshooyinka xuduudaha ku nool.
Dr. Omulo ayaa xusay in istiraatiijiyadda amniga ee Keniya aysan ku koobnayn kaliya fulinta sharciga, balse ay sidoo kale diiradda saareyso wax ka qabashada sababaha asaasiga ah ee amni-darrada. “Iskaashigan aan la leenahay Boqortooyada Ingiriiska wuxuu xoojinayaa mas’uuliyadeena wadajirka ah ee ilaalinta bulshooyinka, sugidda xuduudaha, iyo xaqiijinta in nabadda iyo horumarku ay wada socdaan,” ayuu yiri.
Heshiisku wuxuu dhisayaa hanaan amni oo ay lagu lifaaqay shaqo sirdoon, ka qaybgalka bulshada, iyo iskaashi wadajir ah , iyada oo lagu xoojinayo awoodda Keniya ee la-dagaallanka argagixisada, tahriibka, iyo dambiyada abaabulan, isla markaana lagu taageerayo adkeysiga bulshooyinka gobolka.
