Muqdisho (Dawan )– Qoryaha kuusha ee carruurtu ku ciyaaraan xilliyada Ciidaha ayaa weli halis ku haya badbaadada carruurta, iyadoo ay sii kordhayaan dhaawacyada indhaha iyo shilalka kale ee la xiriira ciyaartan.
Iyadoo sanadba sanadka ka dambeeya ay sii casriyoobayaan alaabaha carruurta lagu maaweeliyo, haddana khataraha ka dhasha isticmaalka qoryaha kuusha ayaa weli ah mid taagan, gaar ahaan marka la eego dhaawacyada halista ah ee indhaha ku dhaca.
Waalidiinta ayaa qiraya in inkastoo ay og yihiin khatarta, haddana ay mararka qaar carruurtooda u iibiyaan si ay uga farxiyaan xilliyada ciidaha.
“Saakay wiil yar oo gacanta laga hayo ayaa la ii keenay oo uu wiilkayga soo dhaawacay, deris ayaan nahay. Haddii cunuga dhib soo gaaro waa dhibaato, haddii qof kale waxyeelleeyo sidoo kale waa dhibaato. Laakiin annaga ayaa suuqa ka soo iibsanay oo qarash ku bixinnay,” ayuu yiri Cumar Xasan, oo ka mid ah waalidiinta.
Xilliyada Ciidaha, suuqyada waxaa si weyn looga helaa alaabaha carruurta ku ciyaarto, sida qoryaha kuusha, bambalayaasha iyo baabuurta. Si kastaba, carruurtu waxay inta badan door bidaan qoryaha kuusha si ay ula ciyaaraan saaxiibadood, taas oo kordhisa halista dhaawacyada.
“Wax walba farxadda cunuga ayaa ka muhiimsan. Laakiin taasi micnaheedu ma aha in la oggolaado in indhaha waxyeello gaarto,” ayay tiri Sacdiyo Jimcaale.
