Muqdisho (Dawan)- Guddoomiyaha Golaha Shacabka ee Baarlamaanka Soomaaliya, Aadan Maxamed Nuur ayaa caawa oo Khamiis ah sheegay in maamulka Koonfur Galbeed uu hor istaagay safar nabadeed oo uu ku tagi lahaa gobolka, taasoo uu sheegay inay wiiqday dadaalladii lagu dejin lahaa xiisadda iyo in la bilaabo wadahadal.
Bayaanka uu soo saaray guddoomiyuhu ayaa lagu sheegay in safarkiisu ujeeddadiisu ahayd in la dejiyo xiisadda siyaasadeed, la bilaabo wadahadal, isla markaana la dhexdhexaadiyo khilaafaadka u dhexeeya dowladda federaalka iyo maamulka Koonfur Galbeed.
Wuxuu sheegay inuu hore ula socodsiiyay Madaxweynaha Koonfur Galbeed, Cabdicasiis Xasan Maxamed Laftagareen, qorshaha safarka iyo ujeeddadiisa, isla markaana ay labada dhinac ku heshiiyeen waqtiga safarka. Si kastaba, wuxuu sheegay in safarka markii dambe la hor istaagay, taasoo keentay inuu dib ugu soo laabto Muqdisho.
“Hor istaagga safarka ayaa labada dhinac ka lumiyay fursad muhiim ah oo lagu yareyn lahaa xiisadda laguna gaari lahaa isfaham iyo wada shaqeyn,” ayaa lagu yiri bayaanka.
Guddoomiyuhu wuxuu muujiyay walaac ku saabsan tallaabooyinka u dambeeyay ee ay qaadeen maamulka Koonfur Galbeed, isagoo sheegay inay sii cakireen xaaladda isla markaana carqaladeeyeen dadaalladii lagu dejin lahaa.