Ku dhowaad 500 AS ah oo go’doon lagu geliyay Jabad Godane

Muqdisho (Dawan)- Ciidamada xoogga dalka Soomaaliya ayaa go’doomiyay ku dhawaad 500 oo dagaalyahan oo ka tirsan ururka Al-Shabaab, kuwaas oo ku sugan deegaanka Jabad Godane ee gobolka Shabeellaha Dhexe, sida uu sheegay Wasiirka Gaashaandhigga Soomaaliya, Axmed Macallin Fiqi.

Wasiirka oo shir jaraa’id ku qabtay Muqdisho ayaa sheegay in dagaalamayaasha Al-Shabaab ay muddo ku dhow toddobaad ku jireen go’doon adag, islamarkaana loo soo jeediyay in ay is-dhiibaan, balse ilaa hadda aysan ka jawaabin baaqaas.

“Deegaanka Jabad Godane ee agagaarka Xawaadleey waxaa ku hareereysan ku dhawaad 500 oo maleeshiyaad ah, kuwaas oo muddo toddobaad ah go’doon ku jiray. Waxaa loo bandhigay in ay isa soo dhiibaan, haddii ay diidaanna waa laga sifeyn doonaa,” ayuu yiri Wasiir Fiqi.

Wasiirka Gaashaandhigga ayaa xusay in ciidamadu ay si dhow ula socdaan dhaqdhaqaaqyada kooxda, isla markaana la siiyay waqti kooban oo ay ku qaataan go’aan ku saabsan is-dhiibidda, ka hor inta aan tallaabo militari laga qaadin.

Dhanka kale, Dowladda Federaalka Soomaaliya ayaa xoojisay maalmihii ugu dambeeyay guluf dagaal oo ka dhan ah Al-Shabaab, kaas oo ka socda deegaanno ka tirsan dowlad-goboleedyada Hirshabeelle iyo Koonfur-galbeed, iyadoo sheegtay in dhowr deegaan ay gacanta ku dhigeen ciidammada dowladda.