Madaxweynaha Soomaaliya oo ku baaqay in midnimo looga gudbo xiisadda Israa'iil

Muqdisho28 Diseembar 2025 (Dawan)- – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa ugu baaqay shacabka Soomaaliyeed, gaar ahaan kuwa ku nool gobollada waqooyi, inay is-dejiyaan oo ay mideysnaadaan si loo difaaco midnimada qaranka iyo wadajirka dhuleed, kaddib tallaabadii Israa’iil ay ku aqoonsatay Somaliland.

Madaxweynaha oo maanta khudbad ka jeediyay Labada Aqalka ee Baarlamaanka ayaa sheegay inaan la joogin xilli la abuuro kala-qoqob qabiil ama mid goboleed,balse ay tahay in la mideeyo awoodda iyo garashada dadka Soomaaliyeed si loo difaaco jiritaanka iyo madaxbannaanida dalka.

Isagoo si gaar ah ula hadlay hoggaamiyeyaasha Somaliland, Madaxweyne Xasan Sheekh Maxamuud ayaa uga digay inay la saftaan ajandayaal shisheeye oo horseedi kara qalalaase iyo xasillooni darro. “Shacabka gobollada Waqooyi, jiho qaldan, ha u riixina, hana u horseedina masiir mugdi ah" ayuu yiri.

Madaxweynaha ayaa mar kale adkeeyey in mowqifka Dowladda Federaalka Soomaaliya ee ku aaddan tallaabada Israa’iil uu yahay mid cad oo aan isbeddelayn.

Dhanka kale, Madaxweynaha ayaa carrabka ku adkeeyey in wadahadalku weli yahay dariiqa ay dowladda doorbideyso. “Waxaa weli naga go’an in wadahadal micno leh laga galo maamulka Somaliland, si l midnimada oo xoojiyo, isfahm waaga jirana meesha looga saaro oo Soomaaliya oo mid ah oo dhinac u wada jeeda aan u helno" ” ayuu yiri.

Isagoo xusuusinaya taariikhda, Madaxweynaha ayaa si toos ah ula hadlay shacabka ku nool gobollada waqooyi. “La idinkuma yaqaano taariikhdiinna kana mid aha in si sahlan degaanadiina lagu martiqaado cadowga ummadda" ” ayuu sheegay.

Waxa uu sidoo kale ka digay in fursadda lagu diidi karo tallaabooyinka noocaas ah aysan mar walba furnaan doonin. “Maanta waxaad haysataan fursad iyo awood aad ku diidaan in lasoo dego dalkiina, laakin ogaada berri ma haysan doontaan fursaddaas,” ayuu ka digay.

Isagoo la hadlayay guud ahaan shacabka, Madaxweynaha ayaa xusay in Soomaaliya ay leedahay dadkeeda, isla markaana isku-day kasta oo lagu kala qaybinayo uu ku dambayn doono fashil.

Ugu dambayn, Madaxweyne Xasan Sheekh Maxamuud ayaa ku celiyey go’aanka Dowladda Federaalka Soomaaliya ee ah in ay ku difaacayso madaxbannaanida, midnimada, iyo xuduudaha caalamiga ah ee dalka iyada oo adeegsanaysa waddooyin sharci iyo diblomaasiyadeed, isaga oo ugu baaqay dhammaan Soomaalida inay u midoobaan wajahidda cadaadiska dibadda. “Soomaaliya, Soomaali baa leh ,” ayuu hadalkiisa ku soo gunaanaday.