Soomaaliya, 3 Oktoobar 2025 – Madaxweynaha Soomaaliya Xasan Sheekh Maxamuud ayaa sheegay in maamulka gobolka Banaadir uu masuul ka yahay arrimaha dhulka magaalada Muqdisho, kadib markii mucaaradku ku eedeeyeen dowladda federaalka inay si qaldan uga rarayso dadka daganaa.
Madaxweynaha oo khudbaddii Jimcaha kaga hadlay masaajidka Madaxtooyada ayaa ka jawaabay eedaha mucaaradka, isagoo sheegay in sharci ahaan Dowladda Hoose ee Xamar ay leedahay awoodda nidaaminta iyo ilaalinta dhulka caasimadda, isla markaana haddii qaladaad dhacaan ay jiraan habab sharci oo lagu saxayo.
“Muqdisho ma sii ahaan doonto magaalo isku raran ah oo ay Al-Shabaab ku dhuuntaan, ama meydad aan laga soo saari karin, ama dab-damis aan geli karin,” ayuu yiri Xasan Sheekh, isagoo ku adkeeyay in tallaabooyinka socda ay qayb ka yihiin sugidda amniga iyo hagaajinta bilicda caasimadda.
