Madaxweyne Xasan: Gogosha waa furan tahay

Muqdisho, 23 December 2025 (Dawan)- Madaxweynaha Soomaaliya, Xasan Sheekh Maxamuud, ayaa si rasmi ah uga jawaabay baaqii wadahadal ee kasoo baxay Golaha Mustaqbalka Soomaaliyeed, kadib markii ay ku yeesheen shir magaalada Kismaayo, isaga oo caddeeyay in dowladda federaalka ay diyaar u tahay wadahadal siyaasadeed isla markaana ay furan tahay gogosha horay loo dhigay.

Madaxweynaha, oo ka hadlayay munaasabadda ololaha xisbiga Cadaaladda iyo Wadajirka, ayaa sheegay in dowladda ay si gaar ah u qaadatay hal qodob oo ka soo baxay war-murtiyeedkii mucaaradka ee shirkii Kismaayo.

“Qoladii ku shirtay Kismaayo, wixii ay ka soo saareen, waxaan ka qaadanay hal qodob. Gogosha waa furan tahay, xafiiska madaxweynaha ayay ka fidsan tahay. Dowladda baaqaas si rasmi ah ayay uga jawaabeysaa,” ayuu yiri Madaxweyne Xasan.

Sidoo kale, Madaxweynaha ayaa hoosta ka xarriiqay in dowladda aysan diidanayn wadahadal ama heshiis, balse ay si cad uga soo horjeeddo in la joogo hal meel muddo dheer.

“Hala wada hadlo ma diidanin, hala heshiiyo ma diidanin, balse meesha hala joogo ayaan diidanahay,” ayuu raaciyay.

Madaxweyne Xasan Sheekh Maxamuud ayaa xusay in wadahadalku aanu ahayn arrin cusub, islamarkaana dowladda ay markale diyaar u tahay in miiska wada-hadalka la isagu yimaado. “Horay waa loo wada hadlayay, haddana diyaar ayaannu u nahay,” ayuu yiri.

Shirkii mucaaradka ee Kismaayo, ayaa ku baaqay in madaxweynuhu muddo hal bil gudaheed ah qabto shir wadatashi ah si looga wada hadlo xaaladda siyaasadeed ee dalka, gaar ahaan arrimaha doorashooyinka iyo Dastuurka. Golaha mucaaradku ayaa sidoo kale sheegay in haddii madaxweynuhu uusan qaban shirkaas in ay iyagu go’aan ka gaari doonaan doorashooyinka.

Hadalka Madaxweynaha ayaa imanaya xilli siyaasadda dalka ay ku jirto is-mariwaa iyo hadallo isdaba joog ah oo warbaahinta la isku marinayo, taas oo ah astaan lagu yaqaano siyaasadda Soomaaliya marka ay soo dhawaato doorasho ama la gaaro dhamaadka mudda xileedka dowladda jirta.