Madaxweyne Xasan oo mamnuucay gaadiidka hubka culus ku rakiban ee Muqdisho

Soomaaliya, 3 Oktoobar 2025 – Madaxweynaha Soomaaliya Xasan Sheekh Maxamuud ayaa Jimcihii mar kale ku celiyey amar hore oo dowladdu soo saartay, kaas oo mamnuucaya gaadiidka Cabdi-bilayaasha ah ee lagu rakibo qoryaha Dhashiikaha, isagoo sheegay inaan la oggolaan doonin in magaalada Muqdisho lagu dhex wato.

“Lama wadan karo gudaha magaalada baabuur Cabdi-bile ah oo qori Dhashiike saaran yahay,” ayuu yiri madaxweynaha, isagoo khudbad ka jeedinayey masaajidka madaxtooyada.

Madaxweynuhu waxa uu ku sifeeyey gaadiidka noocan ah inay yihiin astaan muuqata oo muujinaysa amni darro, isla markaana hoos u dhiga kalsoonida shacabka. Wuxuu sheegay in isaga qudhiisu uu ka tanaasulay isticmaalka gaadiidkan, isla markaana Golaha Wasiirradu horey uga soo saareen go’aanno cad oo ku saabsan.

Madaxweynaha ayaa intaas ku daray in arrintan aan cid gaar ah loogu dan lahayn, balse aysan jirin sabab loo wato gaadiid noocan ah, isagoo tilmaamay in qaarkood si “xarrago ah” loo adeegsan jiray.

Sidoo kale waxa uu xusay in amniga caasimadda uu gaaray heer wanaagsan, islamarkaana uu jiray bil ka mid ah bilihii la soo dhaafay oo aan wax dhacdo amni darro ah ka dhicin Muqdisho.

Golaha Wasiirrada ayaa horey u soo saaray go’aanno mamnuucaya hubka culus, iyagoo oggolaaday in hubka fudud oo keliya la isticmaali karo gudaha caasimadda, taas oo sharciyad iyo xeerar adag lagu xaddiday.